GIBUTYAG ni president Ruffy Magbanua sa Cagayan de Oro Press Club (COPC) nga mag-isyu kini og identipikasiyon (ID) cards sa mga miyembro aron masayod ang publiko nga sila tinuod nga media sa dakbayan sa Cagayan de Oro.
Gibutyag niini nga mag-isyu sila og ID sa mga miyembro sa COPC lakip na sa mga sakop sa Kapisanan ng Brodkaster ng Pilipinas.
“Kami nga mga miyembro will be issuing very soon a COPC press ID. Ang akong suggestion to chairman Tito Monterde nga kada estasiyon or news organization mag issue og ID,” pahayag ni Magbanua.
Dugang niini nga kinahanglan gayud nga magsul-ob og identipikasiyon ang mga media nga pinirmahan sa station manager o sa tag-iya.
“Mag wear gyud na og ID para ma identify gyud ka nga legitimate ka nga media worker or media personality,” dugang pa niini.
Kini tungod na usab sa mga reklamo sa pipila ka mga opisyal sa gobyerno diin dunay mga nagpatuo nga mga media nga gapangayo o gapang solicit ilabi na karong mga panahona. (KCS)