Diola: Pagkakabig

Fr. Carmelo Diola

Binasi sa Sofonias 3:14-18; Isaias 12; Taga-Filipos 4:4-7; Lucas 3:10-18

UNSA may larawan nga mosulod sa atong alimptakan kon pagahisgotan ang “pagkakabig”? Luhang modagayday siguro dayon ang motumaw. Mahimo sad tawo nga dili malarawan ang nawong kay naguol. May uban nga maglisod og dawat sa ilang kaugalingon. Masuko sila sa ilang nabuhat ug sa ilang nadangatan. Dili na sila makig-istorya ni maglingawlingaw. Apan unsa man gyod ang kinaiya sa pagkakabig?

Nangutana ang panon sa katawhan ngadto kang Juan nga Magbubunyag kay naghisgot man kini sa paghukom sa Dios, ang “kasuko sa langit.” Dili luha ni pamalandong ang iyang gipaambit kondili: “Siya nga adunay duha ka sapot, mopaambit sa tawo nga walay sapot; ug siya nga adunay pagkaon mohimo usab sa ingon.” Tubag kini alang sa tanan. Apan aduna pod siyay ikasulti sa nagkadaiyang propesyon. Sa mga kobrador sa buhis: “Ayaw kamo og pagpangobra labaw sa gisugo kaninyo.” Sa mga sundalo: “Ayaw ninyo og hukhoki ni butangbutangi ang si bisan kinsa, katagbawi hinoon ninyo ang inyong suhol.” Praktikal diay kining pagkakabig. Makita sa buhat ug bunga sa kinabuhi.

Apan adunay ikaduhang yugto ang pagkakabig. Kon bag-ohon nato ang atong kinabuhi, kinahanglan adunay ipuli sa gibag-o: “Moanhi ang usa nga labaw pa kanako ka gamhanan... Siya gayod magbunyag kaninyo sa Espiritu Santo ug kalayo.” Pulihan diay ang luna sa atong kinabuhi, nga nahimong haw-ang tungod sa paghinulsol, sa presensya ni Jesucristo. Dili mahimong wala ipuli kay mobalik lang ang gisalikway nga kinaiya. Gikan diay sa paghinulsol molabang diay sa pagkakabig nga molakip sa pagpakigsandurot sa Ginoo.

May lain pang elemento ang pagkakabig. Mao kining ang kalipay nga gihisgotan ni propeta Sofonias: “Singgit sa kalipay, O babayeng anak Zion!...Gitangtang sa Ginoo ang hukom batok kanimo (ug) gihinginlan halayo kanimo ang imong mga kaaway.” Tinuod sagad ang paghinulsol adunay gyoy luha apan luha kini sa kalipay kay nahibalik na ang atong relasyon sa Dios.

Gidugangan pa ni San Pablo ang tawag sa paglipay: “Paglipay kanunay diha sa Ginoo...Duol na ang Ginoo. Tangtanga ang kabalaka, apan diha sa tanan, pinaagi sa pag-ampo ug pangaliya, inubanan sa pasalamat, pahibaloa ang Dios sa inyong mga hangyo. Unya ang kalinaw sa Dios nga labaw sa tanang pagsabot mobantay sa inyong mga kasingkasing ug panghunahuna diha ni Jesucristo.” Kalinaw usab ang lain pang elemento sa pagkakabig.

Nadawat na man nato ang Ginoo, ang Santisima Trinidad, sa dihang gibunyagan kita. Kita ra may nagpalisodlisod sa atong kaugalingon diha sa pagpakasala kay ang kalipay ug kalinaw nga gihatag kanato sa Dios mobiya kanato.

Sa pagsugod nato sa Misa de Gallo ihalad nato atong kaugalingon sa Dios ug pangayoon nato kaniya ang tinuoray nga kinabuhi nga inubanan sa kalipay ug kalinaw. Unsa man kahay gipangayo sa Ginoo ngari kanato aron mahibalik kita kaniya?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph