BISAN pa og labing menos, mga P1.788 bilyones ang gikinahanglan alang sa rehabilitasyon sa mga dapit nga naigo sa landslide diha sa Syudad sa Naga ug sa pag-alima sa mga survivor, mga P844.83 milyones lang ang giduso sa Regional Development Council (RDC) 7.
Ang P1.788 bilyones basi sa giduso nga taho sa Konseho sa Syudad sa Naga sa miaging Disyembre 12 ngadto sa National Economic Development Authority (Neda -7) ug sa Regional Risk Reduction and Management Council (RDRRMC 7).
Angay tingale pangutan-on ang RDC 7 nganong kulang sa pangihanglanon sa Naga ang ilang gigahin. Hinuon, maayo na lang sab kining maong kantidad nga magahin sa RDC 7 kay sa wala.
Maayo na lang sab kay makapauli na ang kapin sa libo ka mga bakwit nga nagpuyo lang sa mga evacuation center sulod sa tulo ka bulan.
Akong nasayran pipila ka semana nga milabay nga moabot og P400,000 ang magasto sa Syudad sa Naga alang sa panginahanglan sa mga bakwit matag adlaw.
Angkas
Bisan pa man og nagduso sa pederalismo si Presidente Rodrigo Duterte, daw wala man kini motuhop sa uban opisyal sa iyang administrasyon. Nakita ko kini diha sa kalipay sa pipila dihang gibasura sa Korte Suprema ang hangyo sa Angkas nga di lang sila hilabtan.
Matod pa, kinahanglan kuno tumanon ang balaod. Ug aktibo kaayong nilihok sama sa usa ka berdugo ang Land Franchising Regulatory Board (LTFRB).
Gibalewala nga linibo ang makulban sa kaldero. Gibalewala usab nga panginahanglan og alternatibong paagi sa transportasyon diha sa barangay sa kabukiran nga karon nagsalig sa mga habal-habal.
Kon maghisgot kitag politika, angayang di mosawsaw sa maong isyu ang oposisyon kon igo lang silang moduot sa mga drayber sa habal-habal ug Angkas lakip na ang mga pasahero kay siguradong makadaot kanila.
BRT
Nahibung gyud ko nganong ang mga nagbabag sa Bus Rapid Transit (BRT) dinhi sa Sugbo mao na karon ang makusganong nagduso niini.
Human gilangay ang maong proyekto og tulo ka tuig aron mahuman unta sa tuig 2019, moingon na sila nga makompleto ang maong proyekto sa 2020.
Gani, madungan pa daw sa Light Rail Transit kun LRT.
Manghinaot ko nga di lang kini kutob sa propaganda sama niadtong gibuhat sa housing czar didto sa Syudad sa Tacloban nga nasulbad na kuno ang housing backlog sa tuig 2016 apan human sa bagyong Yolanda. Dayon paglabay sa pipila ka buwan, igo na lang silang nanghunaw.
Hangtod karon, wa pa gyud mahuman diay.
Di na lang unta sawsawan pa og pamulitika kining mga development projects nga makaayo sa Sugbo. (@anol_cebu sa Twitter)