DILI lamang dugay nga atong giselebrar ang pasko. Makahinumdom pa gani ko sa mga pamasko nga gipangtunol sa akong mga higala dinhing dapita nako, ug sa Christmas party nga among gitambungan.
Apil sa akong mahinumdoman ang mga pagkaon nga among gisaluhan, ug mga dula nga among gipang-apilan. Basta gani pasko, pagkabibo lang gayud kaayo. Apil na ang taas-taas nga bakasyon, sa mga estudyante ug sa mga nangempleyo.
Tinuod man, nindot huna-hunaon nga aduna kitay pasko. Kay kung wala pa, ang Disyembre pastilang mingaw kaayo. Apil na lang gani ang ubang mga nasud nga bisa'g dili Kristiyano, sa pagselebrar sa pasko, kapin pa kay nindot alang sa ilang negusyo.
Ang pasko, mga higala, gisabot sa atong mga kadam-an sa lahi-lahi nga mga paghuna-huna o pagbati. Alang sa mga bata, ang pasko maoy panahon nga makadawat sila og pinaskohan, makadungog og awit pasko, mangaroling sa mga silingan ug mamalit og daghang mga sinina o dulaan.
Alang sa mga teenagers, panahon kini aron makalaag-laag uban sa mga classmates kay wa man lagi'y klase.
Sa mga kolehiyala, panahon nga tiwason nila paghimo sa ilang mga thesis o research papers, apil na dinhi ang mga nagakuha og masters ug doctorate degrees.
Alang sa mga negusyante, dakung ginansiya na sab ang pasko alang nila.
Sa mga nanglimos, haleluya na sab ang pamulsa.
Dili nato malikayan nga kasagaran, puno kita sa atong personal nga huna-huna sa pasko, nga mawala kanato ang saktong espiritu sa pagselebrar niini.
Ang pagpakatawo ni Jesu-Kristo mao ang espiritu sa pasko. Siya nagpakatawo aron Iyang mahatag kanato ang duha ka mga importanteng butang alang kanatong mga katawhan: Una, Iyang bayran ang bayad sa sala pinaagi sa Iyang kamatayon; ikaduha, aron atong makita ang Iyang kinabuhi ug maoy atong sundon.
Ang unang rason maoy makahatud kanato sa kaluwasan, ug ang ikaduha maoy makahatud kanato sa pagsinati sa kaluwasan samtang ania pa kita sa kalibutan.
Normal ra alang kanato karon nga matag pasko, ang mga pamasko maoy atong ginakabisihan. Apan kalipay sa Diyos, mga higala, nga atong hatagan og pagtagad ang tinuod nga kahulogan sa pasko- paghatag og pamasko sa mga kabus ug sa mga walay pamilya.
Ug ang pinakamakalipayon sa atong Diyos, nga matag pasko, atong ipatuman sa atong kinabuhi ang mga tumong sa pagpakatawo ni Jesu-Kristo.
Una, nga atong kuptan pag-ayo ang kaluwasan nga Iyang gihatag kanato pinaagi sa pagpabiling matarong diha Kaniya.
Ikaduha, nga atong ikinabuhi ang pagkamatarong sama sa kinabuhi ni Ginoong Jesus. Mao kini ang saktong pagselebrar sa pasko.
Dili malikayan nga mga pamasko makadawat man jud ka, ayaw balibari, pasalamati ug dawata. Ug alang sa mga kabus, panghatag pod, higala, aron karong pasko, malipay pod intawon sila.
Apan akong sulti kanimo, akong higala, nga kinabuhi diha kang Jesus seguroha, aron ang tinuod nga tumong sa pasko, mapanalanginan ka.
Malipayong pasko alang kanimo, higala ko!