UNANG adlaw karon sa “Simbang Gabi” sa Katolikong Simbahan.
Nahimo na kining tradisyon sa mga Kristiyanong Katoliko nga mosaulog og misa sa sayong kabuntagon una moabot ang Pasko, Disyembre 25.
Gitawag kini og Misa-de-galyo gikan sa pinulongang Kastila nga Misa de Gallo.
Kasagaran sugdan ang “Simbang Gabi” matag ika-16 sa Disyembre ug mahuman sa ikasiyam nga adlaw nga mao ang ika-24 sa Disyembre.
Nagsilbi sab kini isip usa ka nobena alang kang Birhen Maria, ang putling inahan sa Diyos.
Ug dugang pa isip higayon nga makanobena aron nga iampo ang buot natong pangayuon ngadto kang Hesukristo, sa pagtuo nga matuman kini ilabi na gyud kon makompleto ang siyam ka adlaw nga misa.
Di na kini bag-o para kanato, ilabi na dinhi sa dakbayan sa Davao. Kay gani magsugwak man ang mga tawo matag kaadlawon sa nagkadaiyang simbahan sa dakbayan.
Ang pagsimba, giubanan sa atong mga personal nga mga pag-ampo alang sa kaugalingon, pamilya, higala ug uban pa, ug nagalaum nga mahatag kanato ang atong gipangayo.
Kasagaran nga atong pangayuon mao ang kahimsog sa lawas, pinansiyal ug uban pa.
Di man tuod tanan nahatag kanato, bisan og nahuman nato ang siyam ka adlaw nga pagsimba, apan ang importante nga buhi gihapon kita ning panahona.
Ang gasa sa kinabuhi mao ang pinakabililhon nga gihatag sa Ginoo alang kanato.
Unta ang atong pagsimba sa Misa de Gallo, di lang motutok og maayo diha sa pagpangayo apan unta mahibawo sab kitang magpasalamat ngadto Kaniya.
Usahay malimtan nato ang pagpasalamat tungod kay daghan kitang gipangayo.
Mahinungdanon kaayo nga mapasalamaton kita ngadto Kaniya diha sa atong pag-ampo.