HAPIT na mahimugso ang Davao de Oro nga mao na unya ang itawag sa Compostela Valley Province diin perma nalang ni Pangulong Rodrigo Duterte ang kulang.
Ang mga residente sa maong probinsya naghinam-hinam na sa ihulip nga pangalan sa ComVal nga maayo kaayong paminawon nga kabahin sa Davao Region.
Pasado na sa Senado ang Senate Bill 1746 og mas nailang Davao de Oro Bill nga gi-isponsoran nila ni Senador Juan Miguel Zubiri ug Senador Sonny Angara.
Ang lokal nga kagamhanan sa ComVal naglaum nga karong bulana na mapermahan ni Pangulong Duterte ang maong balaudnon.
Una niini, gibutyag ni ComVal Governor Tyrun Uy nga pinaagi niini mas mailhan pa ang probinsya sa mga dagkong magpapatigayon.
Nasayran nga nag-inusarang probinsya nalang ang ComVal nga Davao Region nga walay Davao ang ngalan niini diin ning mga katuigan lamang nahimugso ang Davao Occidental ang ikaduhang distrito sa Davao del Sur. (Jeepy P. Compio)