MAKAPAKURAT ang kadaghan sa shabu nga nasakmit sa kapulisan sa rehiyon kay niabot og 40.5 ka kilo ang ilang nasakmit nga gibana-banang mobalor og P250 milyunes. Mas daku unta tingali kaayo kon wa pa us-usi sa Dangerous Drugs Board (DDB) ang value sa kada gramo sa shabu.
Maorag ang duha ka tuig nga nasakmit sukad sa 2015 ngadto sa 2016 nalabwan lang sa usa ka tuig.
Makapakugang ni tungod kay inay mominos, midaghan hinuon.
Si Police Regional Director Debold Sinas niingon nga tungod kini kay ang ilang mga target, kadto nang mga dagko, di ang street pushers nga ginagmay lang nga pakete ang makuha.
Di sab tingali kay mao kini ang katarungan, kon di tungod kay wa mohinay ang supply sa illegal drugs sa nasod. Maora na hinuon og nagbaha kay nibarato na gani kini sa kadalanan inay momahal.
Ang laing makapaalarma mao ang pagtumaw sa bag-ong drug players nga wa sa listahan sa kapulisan. Ila lang kining nangabisto tungod sa pagtug-an sa ilang mga dinakpan. Ang laing makapadisturbo mao nga bisan kadtong nangabilanggo sa nga big time players nakapadayon sa ilang negusyo.
Kon pulos lang lagi police solution ang ipatuman, mahuman na lang ang termino ni Presidente Rodrigo Duterte, di pa kini masulbad. Masusama kini sa communist rebellion nga sud na sa lima ka dekada nag-uyog sa kagamhanan.
Gikinahanglan ang partisipasyon sa pribadong sektor nga karon ingon sa limitado kaayo. Diri ra kutob sa drug rehabilitation.
Mas maayo tingali nga samtang sayo pa, duna nay educational campaign sa mga tunghaan, pampubliko ug pribado, nga magpakita sa dautan kaayong epekto sa drugas. Mas maayo nga samtang linghod pa ang huna-huna, itisok na ang kahadlok sa illegal drugs.
Maora bag kahoy nga samtang linghod pa, gitul-id na.