YANONG kadaugan ang gibawos sa University of the Visayas (UV) Green Lancers batok sa University of Southern Philippines Foundation (USPF) Panthers aron langkaton ang unang luna sa finals sa 1st Minglanilla Mayor’s Cup Inter-collegiate Christmas League sa Minglanilla Sports Complex.
Sukwahi sa una nilang panagtagbo sa elimination round nga gihamok og kagubot sulod sa korte bisan og sa first quarter pa lang gani, ang Lancers nga ubos sa pagdumala ni assistant coach Junnel Maglasang migamit sa ilang saktong kahanas ug kalantip alang sa ilang saktong dominasyon.
Wala makaduwa ang sentro sa Lancers nga si Hubert Villaceran ug Jiezel Tarroza kinsa gipangsuspenso tungod sa pagkalambigit niini sa kagubot niadtong Miyerkules.
Ang University of Cebu (UC) Webmasters nakaangkon usab og luna alang sa finals human nila gibuntog ang Southwestern University (SWU)-Phinma Cobras, 82-71.
Ang championship game gikatakda kagabii diin ang makampiyon makadawat og P100,000 samtang ang runners-up mouli nga may P60,000.
Mag-ilog alang sa ikatulong luna ang USPF ug SWU diin nakahan-ay ang P30,000 ug P15,000 nga ganting salapi.
Ang torneyo nga gipasiugdahan sa lokal nga pamunoan ubos sa liderato ni Mayor Lani Pena ug municipal administrator Concordio Mejias ipahigayon na sa matag tuig.
Mga puntos:
UV (108) - Cabahug 23, Suerte 15, Butohan 13, Segumpan 11, Claridad 7, Amistoso 7, Avancena 6, Maglasang 6, Rosette 6, Cometa 6, Maestre 6, Delator 5, Saga 5.
USP-F (80) - Cauba 21, Managor 18, Mendez 8, Cada 7, Langahin 6, Archival 6, Villarta 5, Sarahina 4, Patalinghug 3, Estardo 2.
UC (82) - Albina 24, Jabello 13, Kenpack 12, Menina 11, Galinato 9, Naong 5, Bacalso 4, Zerna 2, Tagudin 2.
SWU (71) - Cahuela 18, Imperial 14, Polican 11, Sanchez 9, Roncal 6, Alforque 6, Fernandez 2, Florez 2, Ugzang 2, Molina 2. JBM