NASUGAKOD sa host Golden State Warriors ang gipakitang kabangis ni LeBron James sa dihang ilang gibuntog ang Cleveland Cavaliers pinaagi sa overtime, 124-114, kagahapon sa Game One sa NBA Finals.
Si James nagpakatap og iyang finals career-high nga 51 puntos apan nakawang lang ang tanan niyang paningkamot gumikan sa kapildihan.
Aduna unta’y dagkong mga kahigayunan ang Cavaliers aron angkunon ang kadaugan dihang nahatod sa freethrow line ang usa sa ilang mga beterano nga si George Hill sa nahabiling 4.7 segundos sa regulation period. Niadtong mga gutloa igo ra nga naglabaw og usa ka puntos ang Warriors, 107-106.
Napasulod ni Hill ang premiro niyang freethrow nga maoy nagtabla sa duwa, 107-107, apan iyang nasipyat ang ikaduha.
Naa gihapon unta’y poruhan ang Cavaliers nga maangkon ang kadaugan tungod kay nakuha sa lain nilang beterano nga si J.R Smith ang rebound gikan sa sipyat ni Hill.
Apan unsa bang pagkaunsaa nga imbes modarok pag-itsa unya mamasin nga makahagpat og foul, si Smith mi-dribble sa bola palayo na man hinuon sa ring hinungdan nga nahutdan og oras hinungdan nga nahatod ngadto sa overtime.
“He thought it was over. He thought we were up one,” pasabot ni Cavaliers coach Tyronn Lue sa gibuhat ni Smith.
Apan gipanghimakak kini ni Smith.
Gipasabot ni Smith nga nagtuo siyang motawag ra sila og timeout unya nidugang siya nga kon nilusot pa sab siya, labing seguro madepensaan siya sa nag-atang nga si Durant.
“I just thought we were going to call a timeout. Because I got the rebound, I’m pretty sure I couldn’t shoot it over KD,” matod ni Smith.
“If I thought we were ahead, I would have just held on to the ball so they could foul me. Clearly that wasn’t the case.”
Sa overtime, gipagawas sa Warriors ang katakos nga nagpahimo kanilang defending champions ug ilang gipasutoy ang ilang opensa deretso na paingon sa kadaugan.
Nimugna ang Warriors og 9-0 run pagsugod sa overtime aron pagposte og 116-107 nga labaw sa nahabiling 2-14 minutos. Gikan niini, wala na molingi pagbalik ang Warriors.
Nalangan ang pagtiklop sa duwa dihang miulbo ang kasamok nga naglambigit niila ni Tristan Thomspon sa Cavaliers ug Draymond Green sa Warriors sa nahabiling 2.6 segundos.
Niadtong higayuna, na-ejected si Thompson unya si Green nagsige og pakpak nga tatawng nakapalagot kang Thompson hinungdan nga iyang gitukmod si Green dihang nagkatagbo sila.
Wala sab magpaalkansi si Green ug iyang gibawsan pagtukmod si Thompson hinungdan nga miulbo ang kasamok. Hinuon nauwang ra dayon ang duha.
Gipangulohan ni Stephen Curry ang Warriors pinaagi sa iyang 29 puntos, nidugang og 26 puntos si Klay Thompson samtang nihatag og 24 puntos si Klay Thompson.
Ang Game 2 sa best-of-seven series ipahigayon karong Lunes (RP time) sa korte gihapon sa Warriors. (AP, ESL)