GIPAHIBAWO sa kadagkuan sa GMR Megawide Cebu Airport Corporation (GMCAC) nga ayuhon ang Terminal 1 sa Mactan Cebu International Airport nga gigamit sa domestic flights.
Ang maong kalamboan tipik ug kabahin sa plano sa GMR Megawide pagpanindot sa tugpahanan sukad sa ilang pagdumala sa MCIA upat ka tuig na ang nakalabay isip concessionaire.
Ang budget nga gigahin sa GMR Megawide sa renovation tipik usab sa P17 billion nga gahin alang sa upat ka tuig nga pagpanindot sa Terminal 1 ug 2 sa MCIA.
Duha ka phase ang gikatakdang pagtrabaho sa tugpahanan aron pagsigurong di mabalda ang operasyon niini samtang nagpadayon ang pagtrabaho sud sa tugpahanan.
Ang unang phase sugdan sa Enero hangtod sa Hunyo sunod tuig.
Samtang sa Hulyo ngadto na sa Disyembre usab ang pagtrabaho sa Phase 2.
Sa kasamtangan ang Terminal 1 sa MCIA makaserbisyo sa moabot 8 million ka mga pasahero matag tuig gumikan sa una nang mga renovation nga gipatuman niadtong 2015 ug 2016.
Sa higayon nga mahuman na ang duha ka phase nga renovation sa Terminal 1 sa 2019, makaserbisyo na ang tugpahanan og 11 milllion ka mga tawo matag tuig.
Kon idugang pa ang 4.1 Million ka mga pasahero nga mogamit matag tuig sa Terminal 2, makaserbisyo ang tugphanan og 15.1 million ka mga pasahero matag tuig.
Gibutyag ni Louie Ferrer, presidente sa GMCAC, nga kon ang Terminal 2 sa tugpahanan daw sa usa ka resort ang disenyo niini, lahi usab ang disenyo sa Terminal 1.
Ang desinyo niini tawgon og Budji + Royal Architecture + Design. GCM