P1.7B gikinahanglan sa rehab sa Naga

HUMAN sa dul-an tulo ka buwan human mahitabo ang landslide sa Barangay Tina-an, misumitir ang kagamhanan sa dakbayan sa Naga og P1.7 bilyones nga Rehabilitation and Recovery Investment Program sa Regional Development Council (RDC) 7 pinaagi sa National Economic and Development Authority (Neda) sa Central Visayas.

Lainlain ang mga tinubdan nga kuhaanan sa mga pundo sa pagpatuman sa mga proyekto ug programa alang sa rehabilitasyon ug pagbangon sa 1,947 ka mga pamilya nga naapektuhan sa makalilisang nga trahediya nga nikutlo og 78 ka mga kinabuhi.

Sigon ni Ruth Alensonorin, information officer sa kagamhanan sa dakbayan sa Naga, apil niini ang nagkadaiyang mga ahensiya sa gobiyerno, lokal nga kagamhanan sa Naga ug pribadong sektor, ang Apo Land and Quarry Corporation (ALQC) nga mogasto og P300 milyones alang sa hazard reduction plan.

Sa ikaupat nga full council nga tigom sa RDC 7 sa Biyernes, Disyembre 14, giaprobahan niini ang kapin sa P844.83 milyones sa P1.7 bilyones nga RRIP nga gisumitir sa kagamhanan sa siyudad sa Naga.

Lakip na niini ang P199.8 milyones alang sa pagpatukod og 444 ka housing units sa mga pamilya nga niabandonar sa ilang mga pinuy-anan tungod kay naa kini nahimutang sa critical zone.

Sumala ni Efren Carreon, regional director sa Neda 7, ang RRIP bunga sa mga konsultasyon ug workshops sa local government unit sa Naga ug lainlaing mga ahensiya sa gobiyerno.

“So, dili lang to coming from one agency but product to sa consultations based also on sa post disaster needs assessment nga gi-conduct sa city,” sigon ni Carreon.

Human maaprobahi sa RDC 7, matod ni Carreon, isumitir kini ngadto sa mga National Disaster Risk Reduction and Management Council (NDRRMC) aron irekomendar sa mga ahensiya sa kagamhanan ang mga proyekto ug programa nga iduso aron mapundohan og apil sa 2020 samtang ang uban ikonsiderar sa regular budget sa mga ahensiya sa sunod tuig.

Kinatibuk-ang P461,920,000 ang mga proyekto nga gi-propose sa 2019 nga ang pundo kuhaon gikan sa NDRRM fund, quick response fund, calamity fund ug Balanced Housing Development Compliance.

Naglakip kini sa pagpalambo sa Pangdan River (P150 milyones); site development sa tulo ka mga relocation site (P184.5 milyones); pagpatukod og 192 ka housing units (P86.4 milyones); livelihood projects sa relocation sites (P2.2 milyones); pagpatukod og temporary learning spaces sa sekondarya (11 ka mga lawak, P770,000); pagpatukod og TLS (22 ka mga lawak TLS sa elementarya, P1.5 milyones); disaster-resilient evacuation center (P36 milyones ug pagpahimo og flood early warning system sa Pangdan River (P510,000).

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph