MOABOT sa 279 ka mga pulis sa Cebu Provincial Police Office ang nakadawat og cash rewards gikan sa kagamhanan sa lalawigan sa Sugbo gumikan sa malampusong mga operasyon batok sa gidili nga drugas, sukad sa Enero sa miaging tuig hangtod sa Oktubre ning tuiga.
Kinatibuk-ang, P2.59 milyones ang gitunol nga pahalipay sa Kapitolyo atol sa seremonya nga gipasiugdahan sa Cebu Provincial Anti-Drug Abuse Office niadtong Huwebes, Disyembre 13.
Usa sa mga awardee nga pulis mao si PO2 Dennis Valiente, sakop sa Cordova Police Station, kinsa napusilan atol sa usa ka buybust operation sa Barangay Mambaling, siyudad sa Sugbo sa giingong dakpunon nila.
Siya off-duty niadtong higayona apan dunay nagsulti niya nga dunay gidudahang suspek sa pagpamaligya og gidili nga druga ang dunay katransaksyon hinungdan nisugot siya nga mahimong decoy diin napusilan siya sa iyang tiyan, abaga ug liog human giingong nisukol ang suspek nga si William Sumalinog.
Sila si Gobernador Hilario Davide III ug Cpadao head Carmen Remedios Durano-Meca ang nangu sa pag-apud-apod sa cash rewards. SCG