NING-SURRENDER ang tulo ka giingong drugs personalities sa Talisay Police Station sa alas 7 sa Biyernes sa buntag, Disyembre 14.
Ningboluntaryo og surrender sa Talisay Police Station ang managsuon nga sila si Ranel Labrador, 27, ug Ronald Labrador, 32, ug ilang ig agaw nga si Wendel Segundino, 32, lumad taga Maghaway, Talisay City.
Nagkanayon si Talisay City Police Chief Marlu Conag nga sa tabang sa barangay officials sa Maghaway, gitawagan siya nga adunay tulo ka mga drug personalities ang andam mo-surrender.
“We accepted them,” matod ni Conag.
Matod pa ni Conag nga kining mga ning-surrender, aduna siyay pagduda nga sila mga miyembro sa dakong grupo nga ilang na-encounter sa Maghaway sa may city jail diin adunay tulo nga patay.
Pakyas sila sa pagdakop sa lider sa ambush. Apan ila pa kining klarohon ang maong impormasyon kon unsa ka tinuod.
Usa nga ni-surrender nga si Segundino nisulti sa Superbalita Cebu nga gusto na nilang magbag-o.
Siya niangkon nga mobiligya ug mogamit sila niining ginadili nga drugas.
“Wala pa koy tuig ani. Nakabuhat lang ko ani kay tungod sa barkada,” dugang ni Segundino.
Nanghimakak usab siya nga mga miyembro sila sa grupo nga ning-ambush sa mga city jail personnel.
Giawhag ni Segundino ang iyang mga kauban hilabi na sa taga Maghaway nga mo surrender para magbag-o.
Matod pa ni Conag nga ang mga ni-surrender kinahanglan mo avail sila sa mga serbisyo nga gihatag sa LGU para kanila usa na niini ang pagpa rehab ug i-monitor sila kanunay. Seismundo H. Angelo, USJ-R Intern