TAM-IS nga pahiyom ug puno sa paglaom.
Mao kini ang naabtan sa Superbalita Cebu sa gipahigayon nga Gift of Life Program, panaghiusa sa mga pamilya ug pagpasalamat sa mga doktor nga nakatabang sa mga bata nga adunay sakit sa kasingkasing, niadtong Disyembre 8, 2018.
Lakip sa mga mitambong sa kasaulogan ang mga doktor gikan sa International Children’s Heart Foundation (ICHF).
Gisugdan ang programa sa usa ka daygon diin gikantahan sa mga ginikanan ug mga bata ang kadagkoan sa Vicente Sotto Memorial Medical Center (VSMMC), Gift of Life, Rotary Club of Cebu, ICHF, ug mga doktor.
Adunay magic show nga pwerteng nakapalingaw sa mga bata.
Matag katawa ug kiat sa mga bata nagpakita nga anaa na sa normal nga kondisyon ang ilang kasingkasing human sa malampusong libreng operasyon.
Si Mary Jane Dignos, 13, dako kaayo ang kalipay nga nagmalampuson ang iyang operasyon ug nahatag og ikaduhang kahigayonan nga mabuhat ang gikahiligan niini nga pagdagan.
“Ganahan pa kaayo ko modagan. Basin naa pay plano ang Ginoo nako,” matod ni Mary Jane nga wala kapugngi ang pagtulo sa iyang mga luha.
PAMILYANG TRADIO
Samtang ang magtiayon nga sila Melanie Tradio, 31, ug Maximino Tradio, 26, bisan og wala na nila makauban pa ang ilang anak nga mitaliwan niadtong Nobiyembre 10, mitambong gihapon sa maong kasaulogan ug nagpasalamat sa mga mitabang sa operasyon sa iyang anak.
“Nagpasalamat mi kay human sa operasyon duha ka buwan pod namo siya nga nakauban. Nakita namo nga mikiat na siya. Masugo na namo. Amo siya gidawat as positive nga naay laing plan si God sa amo,” matod ni Melanie.
“Sakit kaayo dawaton. Taas naman god mi og bonding. Ako nalang i-divert nga okay na siya didto, painless na siya,” dugang ni Maximino.
Matod ni Melanie, siyam ka adlaw sa dihang gihimugso niya iyang anak nga si Zaire Stacey Dianne ila nang nasayran nga aduna kini sakit sa kasingkasing, apan tungod sa kalisod sa ilang kahimtang hinungdan nga wala dayon kini nila mapa operahan.
“Gipangayoan mi sa ospital og P800,000 ngadto sa P1 milyon para sa operasyon sa among anak. Dako kaayo ug nahadlok sab mi,” matod ni Melanie.
Mag tres anyos na si Zaire sa dihang naka-desider ang magtiayon nga paoperahan ang ilang anak human kini nagka-pneumonia.
Si Zaire lakip sa naka-benepisyo sa unang pediatric cardiac mission nga gipahigayon niadtong Hunyo 2018.
Human sa operasyon nakita nila nga adunay kausaban sa ilang anak ug ila kining gikalipay ug nanghinaot nga sama sa uban ila na kining makauban sa taas nga panahon.
Apan paglabay sa duha ka buwan, dungan sa pagpanggawas sa mga rashes, mitaliwan si Zaire. Giklaro sa inahan nga dili tungod sa pag-opera nga namatay ang iyang anak. Masakiton na daan si Zaire, matod niya.
Sakit, apan gidawat na sa pamilya niini nga adunay rason ang tanan ug malipayon na ilang anak sa laing kalibotan.
MAS DAGHAN
Matod ni Stephen Chian, ang presidente sa Rotary Club of Cebu, nga sulod sa 12 ka tuig, karong tuiga ang adunay labing daghan nga benepisyaryo nga ilang natabangan.
Miabot sa 45 ka pasyente sa duha ka pediatric cardiac mission nga gipahigayon niadtong Hunyo ug Septiyembre 2018 itandi sa miaging 12 ka tuig nga miabot lang og 40.
Ang libreng pag-opera sa mga bata nga adunay congenital heart disease gipaluhoyan sa Rotary Club of Cebu, Gift of Life, ICHF ug VSMMC.
TRAINING
Kon kaniadto kinahanglan pa nga moadto sa kaulohan aron magpa-opera, apan karon mamahimo na nga makakuha og libreng operasyon sa VSMMC nga kompleto sa pasilidad ug kasaligang mga doktor.
Kini tungod usab sa tabang sa ICHF nga maoy mi-train sa mga doktor sa VSMMC nga mo-opera og pasyente nga adunay sakit sa kasingkasing.
Mismo ang chief executive officer sa ICHF nga si Dr. Rodrigo Soto ang mo-train sa medical team nga mo-opera sa mga bata. Si Soto, kinsa taga nasod sa Chile, usa ka volunteer pediatric cardiac surgeon, o doktor nga espesyalista sa pag-opera sa mga bata nga adunay deperensya sa kasingkasing.
Tungod niini dili na kinahanglan pa nga molangyaw ang mga pasyente ingon man moadto sa kaulohan aron magpatambal.
Ila kining gibuhat aron nga mas daghan pa unyang mga adunay sakit sa kasingkasing ang maluwas.
Ang “reunion” sa mga pasyente ug mga doktor ug sponsors gi-organisa sa Let it Echo, usa ka grupo sa mga ginikanan nga adunay anak nga na diagnosed og coronary heart disease kon CHD.
SCREENING
Alang sa buot nga magpa-screen sa cardiac congenital clinic, abli sila matag Miyerkules, 8 a.m. hangtod alas 12 sa udto, gawas sa holidays, nga nahimutang sa Child Survival Center Cebu sa VSMMC. Usa sa mga requirements nga ang bata dili molapas sa 21 anyos. (B)