Dear Papa Joe,
Ako si Paulino, minyo, nagpuyo sa Cebu City. Magpatambag ko nimo sa akong dakong problema kon unsaon nako pagpauli sa among probinsiya nga akong nadak-an. Gibaharan man gud ko sa ex-BF sa akong wife nga patyon kon mouli ko sa among bukid.
Magbarkada ming upat sa among probinsiya hangtud nga nagka-debelapay mi ug nagpares-pares. Ang akong unang uyab mao ang asawa karon sa uyab sa akong ex-wife, pero ambot og unsang pagkahitaboa nga nagka rambol rambol na man. Ang akong na-asawa mao ang uyab sa akong amigo sa una, ug ang nadayon pod sa akong amigo mao ang akong ex-gf.
Okay ra man unta ang sitwasyon, wala may gubot pero dihang nisugod og communicate nako sa FB ang akong ex-GF sa una, nasakpan sa iyang bana bisag wala man unta mi nagbuhat og dautan. Nagkumustahay ra man, hangtud niapil na ang akong asawa og away nila.
Nalab-as na ang mga panghitabo sa una ug karon pa nako nasayri duna jud diay tinaguan nga kasuko ang usag-usa namo. Gibaharan pa ko sa lalake nga dunay mahitabo nako kon motunob kog balik sa amo. Unsay buhaton nako? Please tambagi ko.
PAULINO
Dear Paulino,
Para nako misunderstanding ra gyud nang tanan. Dunay mga issues ninyong upat nga magbarkada nga wala gyud mahusay kay ang nahitabo nagbaylo-baylo ra diay mog uyab. Dili gyud na mahusay kon way usa ninyong mopaubos. Pwedeng ikaw ang mo lower sa imong pride ug makig estorya tarong sa imong amigo bisag sa text lang. Klarohon ninyo kon unsa gyud ang problema nga nagkagubot-gubot man mo.
I’m sure kon walay nagbuhat og dautan sa usa ninyo presently, mahusay ra mo. Kon dili gani, magpatabang mog husay sa inyong mga ginikanan kay magbarkada ra man kaha mo sa usa ka probinsiya sa una? So, sigurado kong managkaila ra pod inyong parents. Daghang salamat
PAPA JOE
(sa inyong mga problema ipadala sa papajoesuper@gmail.com)