DI mominos 27 ka mga traysikol drayber ang napili nga mga benepisyaryo sa Emcor Inc. ug Jesus V. del Rosario Foundation (JVRF) alang sa programa nga rent-to-own nga mga Bajaj Re tri-wheeler nga mahimong magamit isip traysikol aron mapanginabuhian.
Ang Emcor Inc. dealer og mga motorsiklo, Bajaj Re tri-wheeler, appliances, furniture, computers ug IT (information technology) products, uban sa JVRF mingtabang sa mga kabos sa mga komunidad pinaagi sa ilang corporate social responsibility (CSR).
Apil sa mga kalihukan sa Emcor nga kabahin sa ilang CSR mao ang scholarship grants, feeding program, school building donations ug relief operation campaigns panahon nga dunay mga kalamidad.
Tumong niini nga maayudahan ang mga programa sa gobiyerno alang sa pagtabang sa labing nanginahanglan.
Karong tuiga, ang mga benepisyaryo kay mga kabos apan angayan nga mga miyembro sa Tricycle Operators and Drivers Association (Toda).
Sila gipaubos sa pre-qualified alang sa maong programa.
Matag benepisyaryo, nakadawat og usa ka unit nga Bajaj RE tri-wheeler nga dunay libre nga tulo ka tuig nga registration sa Land Transportation Office, tulo ka tuig nga Compulsory Third-Party Liability insurance, tulo ka tuig nga prangkisa sa traysikol ug usa ka one-year comprehensive insurance.
Kini gipaagii sa rent-to-own basis. Apan, dili manginahanglan og cash-out sa higayon i-turnover na ang unit tungod kay kini zero-down-payment ug zero-interest program sud sa 36 ka mga buwan.
Sa higayon mahuman og bayad ang 36 ka buwan nga term, laing benepisyaryo ang makapahimus sa programa, hinungdan nga magkadaghan ang mga benepisyaryo sa matag tulo ka tuig.
Ang napili nga 27 ka mga benepisyaryo taga siyudad sa Mandaue. (PR)