DAGHAN pa gyud diay ang matinuoron nga mga drayber og taxi karong panahona bisan sa kalisod.
Karong bag-o, si Ruben Laborte, usa ka drayber sa Citrasco taxi ang niuli sa cellphone nga nabiyaan sa iyang pasahero sud sa unit nga gimaneho niini.
Ang pasahero nga si Johanna Marie Bajenting, tigbalita sa SunStar Cebu, nagpahatod sa P.C. Hills sa Barangay Apas, siyudad sa Sugbo aron motambong og Christmas Party.
“Abi gyud nako og di na mauli, pwerti gud ka-importante ani (cellphone),” paambit ni Bajenting.
Siya nakadayeg sa drayber nga nangita og paagi nga mahatod ug mabalik niya ang nahabilin nga cellphone.
Matod ni Laborte, ang iyang mga pasahero nga nagpahatod niya sa Perpetual Succour Hospital, dakbayan sa Sugbo maoy nakakita sa cellphone ni Bajenting nga natagak sud sa taxi nga iyang gimaneho.
Panghinaut sa tigbalita nga managhan pa ang sama ni Laborte nga matinuoron sa ilang pagserbisyo sa mga pasahero.
Alang ni Bajenting usa kini sa labing nindot nga pinaskohan nga iyang nadawat karong Pasko.
Samtang si Laborte, wa usab sukod ang iyang gibating kalipay dihang iyang nakita sa panagway ni Bajenting ang tumang kalipay nga nahibalik ang iyang cellphone. (SCG)