PAREHONG nagpakatap og triple-double sila si LeBron James ug Lonzo Ball aron pangulohan ang dakong kadaugan sa Los Angeles Lakers batok sa host Charlotte Hornets, 128-100, kagahapon sa National Basketball Association (NBA).
Ang four-time MVP nga si James nimugna og 24 puntos, 12 rebounds ug 11 ka assists samtang ang batan-ong si Ball nihimo og 16 puntos, 10 rebounds ug 10 sab ka assists.
Sa kasaysayan, ikaduha pa lang kini nga higayon nga duha ka mga sakop sa Lakers ang nakaposte og triple-doubles sa usa lang ka duwa.
Ang unang nakahimo niini mao ang panagpares nila ni Magic Johnson ug Kareem Abdul-Jabbar niadtong Enero 22, 1982.
Si Lakers coach Luke Walton nasurpresa dihang iyang nasayran nga ikaduha pa lang sila si James ug Ball nga namugna niini sa kasaysayan sa Lakers.
“I know it’s not easy. There have been a lot of good players in Lakers history and I figured Walton and Kobe (Bryant) would have done it a few times,” sagol komedya nga asoy ni Walton, kinsa kanhi small forward sa Lakers dihang nagkauban sila ni Bryant.
Si Ball, kinsa naa pa lang sa iyang ikaduhang tuig sa NBA, nagkanayon nga bisan sa iyang mga damgo, wala siya magtuo nga mahitabo kini.
“It’s crazy, man,” matod ni Ball. “I watched a lot of him (LeBron) growing up and now we had triple-doubles in the same game. I don’t even know if I dreamed of that before.”
Si James mihangop niini nga isip usa ka espisyal nga panghitabo.
“Any time you can put yourself in the conversation of Laker history, all the guys that have come through this franchise, it’s pretty special,” matod ni James.
Gipasabot ni James nga kon hisgutan ang paghan-ay sa ilang set plays, pareho sila og abilidad ni Ball hinungdan nga pareho silang nakamugna og triple-double.
“We are always looking for our teammates and that’s the greatest satisfaction we can have when we see our teammates score the ball,” pasabot ni James.
“Always been pretty good rebounders for our positions. Him at the guard spot and me at the 4. ... We just try to be aggressive, attack the rim, make shots. We showed all that tonight.”
Ang layup ni Jeremy Lamb sa pagsugod pa lang gyud sa duwa maoy nakaposte sa nag-inusarang higayon nga nakalabaw ang Hornets.
Human niini, hinayhinay nang misutoy ang Lakers hangtod nga hingpit na nilang nakontrolar ang duwa.
Ang Lakers mingsaka sa 18-11 nga rekord samtang ang Hornets natagak sa 14-15 nga rekord. (AP, ESL)