NAGBAHA gihapon ang shabu sa Dakbayan sa Sugbo bisan sa subsob nga operasyon sa kapulisan batok sa mga durugista.
Makapalabad sa ulo ang pangutana nganong dinagko ang kantidad sa mga drugas.
Kaniadtong Sabado, Disyembre 15, mokabat og P11.2 milyones nga kantidad sa shabu ang nasakmit sa managlahing operasyon sa dakbayan. Sa susamang adlaw, nasikop ang kanhi kandidata sa Bb. Cebu 2018 nga si Teri Marina Colmenares, 22, tungod sa pagpamaligya og high grade nga marijuana.
Daghan na pong napatay nga mga durugista sa Central Visayas. Sa talaan sa Police Regional Office 7, ang mga operatiba nakapatay na og 76 ka mga pusher human sila giingong nanukol.
Bagsik lang ba gyod ang mga pusher ug dili sila mahadlok makigsinukliay og mga bala sa kapulisan? Apan naay makapaduda nga operasyon ang mga sakop sa Carbon Police Station sa Cebu City Police Station kaniadtong Disyembre 8 sa Barangay Guadalupe.
Nakuhaan og kapin usa ka kilo nga shabu nga nagkantidad og P7.4 million si Addreaainne Lester Adlawan Mendez, 28. Nasikop pod ang iyang hinigugma nga misuway og suborno sa mga operatiba.
Miangkon si Mendez nga usa siya ka pusher ug napugos siya pagsulod sa ilegal nga negosyo tungod sa kalisod sa kinabuhi. Apan dili siya makatuo nga miabot og kapin usa ka kilo ang shabu nga nakuha gikan niya.
Nagpasabot ba ni nga gibutang-butangan og ebidensiya si Mendez? Basin buot mahulagway sa kapulisan nga nagkagrabe ang suplay sa shabu sa siyudad sa Sugbo aron madaot ang imahe niini ug madaot ang mga lider, labi na si Mayor Tomas Osmeña.
Si Osmeña namasangil nga ang kapulisan maoy nagpaluyo sa ubang mga patay human ang iyang kaalyado nga si Tejero Councilor Jessielou Cadungog gisuwayan og banhig sayo ning tuiga.
Ang mayor pod ang nag-una-una og pagawas sa ngan ni SPO1 Roderick Balili nga giingong usa sa mga mibanhig patay sa usa ka PDEA agent sa Carcar City sayo ning tuiga.