MOKABAT sa 5,000 ka mga drayber sa Angkas dinhi sa Sugbo ang maapektohan kon ipahunong ang operasyon sa maong application-based motorcycle ride nga susama sa Grab ug Uber. Ngiob ang Pasko alang sa mga drayber nga nagsalig sa Angkas alang sa ilang inadlawng panginabuhi.
Kon ang matag drayber makapasakay og labing menos 10 ka mga pasahero sa matag adlaw, nagpasabot kini nga mokabat usab sa 50,000 ka mga sumasakay dinhi sa Sugbo ang apektado. Wa pay labot niini ang mga drayber sa habal-habal nga malakip sa pagdakop kay gidili man sa balaod ang paggamit sa mga motorsiklo nga depasaheroan.
Ang Korte Suprema sa unahan miluwat og usa ka temporary restraining order batok sa usa ka desisyon sa korte sa Mandaluyong nga nagdili sa mga awtoridad sa pagsikop sa mga drayber sa Angkas.
***
Ang Land Transportation Office (LTO) ug ang Highway Patrol Group (HPG) sa Philippine National Police nilusad niadtong Sabado, Disyembre 15, og usa ka joint operation sa pagpangsikop sa mga drayber sa Angkas ug habal-habal.
Magpadayon ang pagpanakop samtang di pa maresolbar ang kaso mahitungod sa Angkas didto sa Korte Suprema. Unsay mahitabo niadtong mga tawo nga ni-resign sa ilang trabaho aron mag-drive og motorsiklo sa Angkas? Apan ang unang tubagon mao ang pangutana maghitungod sa mga sumasakay nga nagsalig sa Angkas ug sa habal-habal, ilabi na sa mga lagyong dapit ug kabukiran.
***
Dinhi sa syudad sa Sugbo, si Cebu City Mayor Tomas Osmena miluwat og usa ka “spot amnesty” niadtong mga motorsiklo nga na-impound kay nag-counterflow.
“In the spirit of Christmas, I will grant spot amnesty.... All the impounded motorcycles now at the SRP (South Road Properties) will be released,” nagkanayon si Osmena.
Pero klaro kaayong nisakay lang sa isyu si Osmena kay di man kini mao ang solusyon. Ang problema bahin sa balaod nga kinahanglang amendahan aron katugotan ang mga motorsiklo nga himuong depasaheroan.