NAG-VIRAL ang balita kabahin sa usa sa mga kandidata sa Bb. Cebu 2018 nga nadakpan sa kapulisan sa usa ka buy bust operation sa Sabado sa kaadlawon sa may dan Escario, dakbayan sa Sugbo.
Nakuhaan si Teri Marina Colmenares, 22, og pito ka mga putos sa high-grade marijuana nga gituohan sa kapulisan nga gikan sa abroad. Ang mao nga matang sa marijuana motubo lang sa mga rehiyon sa Afghanistan ug Pakistan. Ang mao nga mga nasod nailhan usab nga mga tinubdan sa taas nga matang sa cocaine.
Klaro nga kompyansa si Colmenares kay dali rang nisakay sa text sa kapulisan. Sagad man gud sa gigukod karon sa kapulisan mao ang shabu ug plantasyon sa marijuana. Hayan wa siya magtuong mga pulis ang iyang gika-transact.
Sagad usab sa mga kliyente o manggamitay nianing high grade nga marijuana gikataho nga mga adunahan lang. Busa mas lisod masakpan ang mga mamaligyaay niini. Di usab kini naandan lang nga matang sa marijuana, busa kadto lang maka afford ang mamahimong makapalit niini.
Ang nakalisod sa pagsakop niining matang sa ilegal nga industriya mao ang mga kliyente ug mamaligyaay mga kaila ra. Sagad gamiton ra sab kon dunay party.
Apan ang impormasyon nga nakuha sa kapulisan nga gipaagi kini og courier sa pagbiyahe gikan sa Mindanao angay nga susihon.
Awhagon sa kapulisan ang mga in-charge sa mga courier services nga moestrikto sa pagputos ug pagkarga sa package aron di makalusot ang mga ilegal. Seguraduhon usab sa mao nga mga kompaniya nga wa silay kawani nga kakunsabo sa pagpalusot.
Di ba sa di pa puston ang ipadala nga mga item ila man kining susihon aron masuta ang balor? Kon gitabunan man gani kini, angay nang mohimog lakang ang mga kompaniya aron masuta unsay gipakarga kanila.