SECTIONS
Sunday, February 24, 2019
SUPERBALITA CEBU

‘MJ dealer’ di motug-an kinsay tinubdan: pulis

NAGDUMILI ang kanhi kandidata sa Binibining Cebu 2018 sa pagtug-an diin gikan ang iyang high grade nga marijuana nga nakuha human siya madakpi sa kapulisan.

Matod ni Senior Insp. Dexter Basirgo, hepe sa Guadalupe Police Station, nga mitabang og kumbinser ang inahan ni Teri Marina Silva Colmenares, 22, sa pagtug-an kon kinsa ang iyang supplier. Apan pakyas sila pagkuha og kasayuran.

Nadakpan si Colmenares atol sa gipahigayong buy- bust operation sa mga operatiba nga gipangulohan ni Basirgo sa Dalan Escario, Barangay Kamputhaw, Siyudad sa Sugbo alas 2 sa kaadlawon sa Sabado, Disyembre 15.

Siyam ka pakete nga adunay sulod nga high grade nga marijuana ang nakuha gikan sa dinakpan. Lakip sa nakuha sa mga operatiba ang P2,600 nga gituohang halin ni Colmenares, cellular phone ug iyang sakyanan.

“Kon mitug-an pa siya sa iyang source, makuha unta dayon to namo. Morag naa siyay gikahadlokan,” matod ni Basirgo.

Niapil sa Binibining Cebu 2018 si Colmenares isip Miss Carmen. Nakaabot siya sa Top 25 sa naasoyng indigay sa katahom.

Mopasaka ang Guadalupe Police Station og reklamo sa Cebu City Prosecutor’s Office batok ni Colmenares karong adlawa kon makuha na ang chemistry report gikan sa Philippine Drug Enforcement Agency 7.

Mag-atubang og sumbong si Colmenares sa paglapas sa Sections 5 (pagpamaligya og ilegal nga drugas) ug 11 (pagtinir og ilegal nga drugas) sa Republic Act 9165 kun Comprehensive Dangerous Drugs Acts of 2002.

Mitumaw ang ngan ni Colmenares human masikop Nicole Allan Casiño, 24. Si Casiño mitug-an nga giangkat niya ang marijuana gikan ni Colmenares.

Niadtong Disyembre 8, silang Basirgo nakadakop og disc jockey nga gipasanginlang milugos og usa ka babaye human na-high sa acid nga LSD. (B)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!