GISAGOLAN ni Mayor Tomas Osmeña og pamolitika ang iyang pagpadakop sa mga motorist nga nakalapas sa iyang Executive Order 034 kon counterflow human iyang gihatagan og “spot amnesty” ang mga violator.
Kini ang paghulagway ni Bise Mayor Edgardo Labella human gisugdan og release sa Cebu City Transportation Office (CCTO) ang gatusan ka mga motorsiklo nga na-impound sukad pa niadtong Nobiyembre.
Si Labella niingon nga gihimo kini sa mayor aron pagkuha sa mga boto sa apektado apan iyang gihulagway nga human nga nagsakripisyo ug nag- antos ang mga motorcycle owner sa pagpa-impound ni Osmeña.
Dili kini husto, matod ni Labella.
“Maybe he has finally realized that what he did was not legally correct and I think in doing so, considering that the election is forthcoming, maybe there is an election dimension here that is why he is constraint to release,” matod ni Labella.
Gitug-an sa bise mayor nga adunay daghang mga tawo nga niduol sa iyang buhatan kay gustong magpatabang gumikan sa pagka-impound og 30 ka adlaw sa ilang motorsiklo kay lage ni-overtake gumikan sa kahinay sa ilang gisundan apan gidakop sila.
Para ni Labella sobra ra ang pag-impound sa motorsiklo nga iyang gihulagway nga wala na masobay sa local nga balaod kansang mga motorsiklo gigamit sa ilang panginabuhian ug paghatod sa ilang mga anak ngadto sa ekswelahan.
Ang mga motorsiklo dili maoy makadala sa traffic kon mo-overtake sanglit dali ra silang makabalik sa ilang driving lane inay ang mga four wheel vehicle maoy hingusgan sa CCTO, matod ni Labella.
Gidasonan ni Labella ang pagpa-release sa mayor sa mga motorsiklo aron adunay magamit sa Pasko. Si Labella ug Osmeña mag-atbang sa pagkamayor atol sa eleksyon sa Mayo 13, 2019. (HBL)