ANG pagkumpleto og simba sa siyam ka adlaw nga Misa de Gallo sugod sa Dominggo, Disyembre 16, wala magpasabot nga automatic usab nga matuman ang pangandoy sa tawo nga nakahimo niini, sumala ni Cebu Archbishop Jose Palma.
Matod niya, mag-agad ang tanan sa Ginuo sa pagtuman sa pangandoy sa tawo bisan kon walo ka adlaw nga Misa de Gallo lang ang nasimbahan niini.
“As always it depends on God, whether you attend eight days or nine days. The most important thing is your trust in the Lord. But to associate the favor with any automatic completion of anything is not the spirit of Christianity,” pagpasabot ni Palma human sa misa sa unang adlaw sa Misa de Gallo nga iyang gipangulohan sa Archdiocesan Shrine of Immaculate Heart of Mary sa lungsod sa Minglanilla, Dominggo sa kaadlawon, Disyembre 16.
Siya nipasabot niini human ang ubang mga tawo nagtuo nga matuman ang ilang pangandoy kon makahuman sila og simba sa siyam ka adlaw nga Misa de Gallo.
Sumala sa arsobispo nga bisan og dili holiday of obligation ang siyam ka adlaw nga Misa de Gallo, apan ilang gidasig ang mga tawo nga mokumpleto og simba niini.
Nisabot hinuon siya nga dunay uban nga dili makahuman gumikan sa pipila ka mga sirkumstansya sama sa dunay balatian o naay trabaho.
Sigon niini ang simbang gabii nga tradisyon nga gidayeg sa ubang kanasuran, usa ka pagpasidungog kang Maria nga dunay labing dako nga bahin sa pagkatawo sa Ginuo hinungdan ang vestment nga sul-obon sa kaparian sa Aguinaldo kay puti o blue nga nagpasidungog sa kaputli sa kasingkasing sa Birheng Maria.
Sa iyang wali, gipahinumduman sa arsobispo ang mga tawo nga dili lang ang gusto ang buhaton kondili kon unsa ang angay nga himuon nga subay sa kabubut-on sa Diyos.
“Daghan kita og mga butang nga gustong buhaton pero naay mga butang nga gusto nato pero dili maayo. Bisan pa maayong butang, timan-i kondili mao ang kabubut-on sa Diyos mao kini ang atong unang pamalandungan. Kining akong buhaton mao ba kini ang kabubut-on sa Diyos?” pagpahinumdom ni Palma sa mga tawo.
Siya niingon nga bisan sa mga plano, usahay ang mga tawo maghimo og mga butang isip reaksyon sa mga nahitabo ug ang katuyoan alang lamang sa ilang kaugalingon.
“Pero karong buntaga, gipahinumdom kita nga ang atong kinabuhi dapat maghunahuna gihapon ta dili lamang sa atong kaugalingon pero sa atong isig kaingon kay sa atong kinabuhi dili lamang personal kondili social,” dugang pagpasabot sa arsobispo.
Sa iyang wali, siya usab gipaambit ang aktibo nga papel sa artsidyosesis sa Sugbo sa pagplano sa mosunod nga International Eucharistic Congress sa Hungary sa Septiyembre 2020.
Matod niya, ang mga kasinatian sa Sugbo ilang gipaambit ngadto sa mga organizer isip kanhi host sa dakong kalihokan nga nahitabo dinhi niadtong 2016. (B)