HUMAN sa napulo ka dekada nga gitago-ang Balangiga Bells sa mga Amerikano, karon hingpit na kining nabalik sa Pilipinas ug hilabihan ang kalipay sa mga taga Eastern Samar gumikan didto gayod kini naggikan kanila.
Nahimong kabahin sa mabulukong kultura ug kina-adman sa mga taga Eastern Samar ang nasampit nga mga kampana, maong mituhop gayod kanila ang paghangop niini.
Gani mismong si Pangulong Rodrigo Duterte ang mi-turnover ani ngadto sa simbahan sa Balangiga, apan wa na magdugay ang pangulo ug nilakaw sab dayon kini.
Ang paglakaw dayon sa pangulo gilayong nahimoan og isyu, gumikan giingong di mo-atubang ang presidente ngadto sa kadagkoan sa simbahan tungod sukad pa niadto, kalaban naman gyod kini niya.
Apan ang nahitabo, gilayong gitin-aw sa Malacañang nga wala gilikayan ni Pangulong Duterte ang mga pari ug obispong Katoliko maong wala kini katambong sa “high mass”.
Sumala ni Presidential Spokesman Salvador Panelo, giingon niini nga daghan og aktibidad si Pangulong Duterte maong kinahanglan niini nga makauli dayon human sa pag-turnover sa mga kampana niadtong Sabado, Disyembre 15.
Sa maong hitabo, wa man nagbutyag og pangalan ang simbahan, gilayon dayong nagpadungog si Manila Archbishop Luis Antonio Cardinal Tagle sa iyang homily sa unang kaadlawon sa simbang gabi, nga di suma pa maayo nga gamiton sa mga gamhanang tawo ang posisyon niini aron mabiay-biay ang ubang tawo.
Wala nakabalo ang katawhan unsay lawon nga buot ipasabot ni Tagle nga mikutay kini ngadto sa pag-handover sa Balangiga Bells.
Pasko karon, panahon sa tumang gugma ug pakigdait, ug unta magkasinabot na ang simbahan ug sa pamaagi sa gobyerno ni Duterte aron mabati ang gugma ug kalipay sa tanang Pilipino.