TACURONG CITY -- Gitay-og sa masipa nga pagbuto sa eksplosibo ang balay sa usa ka lokal opisyal alas 7:05 sa gabii niadtong Sabado, Disyembre 15, sa probinsiya sa Cotabato.
Sumala kang Sultan Kudarat Police Provincial Director Senior Superintendent Reynaldo Felestino nga duha ka wala mailhing tawo nga sakay sa motorsiklo ang mi-itsa og granada sa balay ni Lambayong Sultan Kudarat Municipal Mayor Ramon Abalos sa Barangay Poblacion Lambayong.
Abtik sab nga mi-ikyas ang mga suspetsado paingon sa hilit nga dapit sa Lambayong Sultan Kudarat.
Walay naigo sa pagbuto sa granada gawas lamang sa mga nangabu-ak nga samin sa pinuy-anan ni Abalos nga niadtong orasa wala sa iyang balay.
Kahinumdoman nga niadtong Hulyo 29, gi-itsahan sab og granada ang balay ni Abalos diin naangol ang iyang igsoon nga si Municipal Councilor Carlos Abalos ug iyang paryente nga si Richard Abalos.
Gisundan sab kini sa pagpang-itsa og granada sa Municipal Police Station sa Lambayong apan walay naigo sa mga pulis.
Politika ang gitan-aw ni Abalos sa sunod sunod nga pagpang-itsa og granada sa iyang balay.
Sa kasamtangan gipahugtan pa sa kapulisan ang seguridad sa Lambayong uban ang militar ug mga sakop sa Citizen Armed Forces Geographical Unit. (Edgar Fuerzas)