COTABATO CITY –- Tulo ka notoryus nga drug pusher ang nadakpan alas 11:15 sa buntag niadtong adlaw nga Sabado, Disyembre 15, sa siyudad sa Cotabato.
Giila ang mga suspek nga sila Basir Tanguan Tantong alyas Tapilak, iyang asawa nga si Vilma Pikit Tantong, mga molupyo sa Barangay Kadingilan, Pigcawayan North Cotabato apil na si Alma Paglas Akmad nga taga Barangay Rosary Hieghts 3, Cotabato City.
Matud ni Cotabato City Police Director Senior Superintendent Rolly Octavio nga nagpahigayon sila og buy-bust operation uban ang Philippine Drug Enforcement Agency (PDEA)-ARMM ug Army Special Forces sa Notre Dame Avenue, Barangay RH-3 sa siyudad.
Sa diha nga gitunol na sa mga suspek ang shabu sa asset sa PDEA-ARMM didto na sila gidakop ug giposasan.
Narekober gikan sa tulo ka suspek ang dagkong pakete sa gituohang shabu nga dunay street value nga P1.7 milyon.
Gikanayon ni PDEA-ARMM director Juvinal Azurin nga dugay na nilang gipanid-an ang mga suspek nga nalambigit sa pagpamaligya og druga sa North Cotabato, Maguindanao ug Cotabato City.
Sa kasamtangan, gisang-at na batok sa mga suspek ang kasong kalapasan sa Republic Act 9165 o Comprehensive Dangerous Drugs Act of 2002. (Edgar Fuerzas)