SUGOD sa Misa de Gallo Domingo sa buntag, Disyembre 16, nahimong malinawon ang siyudad sa Davao, kini ang deklarasyon sa pipila ka mga station commanders sa Davao City Police Office (DCPO).
Malipayon nga gibalita ni Police Chief Inspector Benkalin Baluan ang station commander sa San Pedro Police Station nga malinawon ug walay panghitabo atol sa pagsugod sa Misa de Gallo sa iyang area of responsibility.
Daghang mga kapulisan, police auxiliaries ug mga force multipliers sama sa barangay police ang gibutang sa mga lugar nga dugukanan sa tawo ilabi na sa mga simbahan.
Gipasalig usab sa kapulisan nga dili lamang sa mga lugar nga dunay panagtigum sila nagpahigayon og pagbantay, apan duna usab nagpatrolya sa mga lugar sa siyudad aron maprotektahan ang mga kabalayan nga dili masudlan sa mga kawatan.
Una niini, gideklara ni Police Chief Superintendent Marcelo Morales ang full alert status sa tibuok rehiyon gumikan sa pagsugod sa Misa de Gallo.
Gimanduan ang kapulisan sa tibuok rehiyon sa paghatag og igong seguridad sa mga simbahan ug uban pang mga lugar nga ginaadtoan sa tawo, karong kapaskuhan.
Wala sab mga sakop sa kapulisan ang ginatugutan nga maka-leave sa ilang trabaho. (Richy F. Nalagon)