MACO, Compostela Valley Province -- Gibalhog sa selda sa kapulisan ang usa ka misis ug ang kabit niini nga lalaki human siya nasapon sa bana nga nag-ipon na sila.
Alas 3:40 sa hapon niadtong Miyerkules, Disyembre 12 midangop sa Maco Municipal Police Station (MMPS) si alyas Jun-Jun (tinuod nga pangalan gitago) nagpuyo sa Purok 11, Barangay Upper Cabaywa, Asuncion, Davao del Norte kinsa nangayo og tabang human nangabit ang iyang asawa.
Alas 2:00 sa kaadlawon niadtong Biyernes, Disyembre 14, nag-alayon ang MMPS, Second Compostela Valley Mobile Force Company ug 71st Infantry (Kaibigan) Battalion sa Philippine Army ug gilusad ang operasyon batok sa mga suspek.
Kauban ang nagsumbong, gisulod sa otoridad ang minahan nga parti sa Purok 3, Barangay Teresa, Maco, Compostela Valley ug didto nadakpan ang duha nga malu-ibon.
Nadakpan ang misis nga si alyas Dalia, 33-anyos, nagpuyo sa Purok 11, Upper Cabaywa, Asuncion ug si alyas Rey, 34-anyos, minyo, minero, nagpuyo sa Purok 3, Barangay Teresa, Maco.
Ang duha na-aktuhan mismo sa bana nga nagpuyo na sa usa ka balay.
Sa kasamtangan, ang mga dinakpan gikustodiya na sa MMPS ug gikatakda ang pagpasaka og kaso batok kanila didto sa korte. (RSC)