Lancers kampiyon sa Minglanilla Mayor's Cup

CEBU.  Ang kinatibuk-ang puwersa sa UV Green Lancers nga pormal nga midawat sa championship trophy cash prize nga gi-award ni Mayor Lani Pena ug vice-mayor Jojo Selma atol sa awarding ceremony  human sa championship game sa Minglanilla Mayor's Cup nga gipahigayon niadtong Sabado sa Minglanilla Sports Complex. (SunStar photo/Arni Aclao)
CEBU. Ang kinatibuk-ang puwersa sa UV Green Lancers nga pormal nga midawat sa championship trophy cash prize nga gi-award ni Mayor Lani Pena ug vice-mayor Jojo Selma atol sa awarding ceremony human sa championship game sa Minglanilla Mayor's Cup nga gipahigayon niadtong Sabado sa Minglanilla Sports Complex. (SunStar photo/Arni Aclao)

GISAKMIT sa University of the Visayas (UV) Green Lancers ang kampiyonato sa 1st Minglanilla Mayor's Cup Inter-collegiate Christmas League basketball tournament pinaagi sa pagpukan sa University of Cebu (UC) Webmasters, 104-99, sa championship match niadtong Sabado sa Minglanilla Sports Complex.

Si Rey Suerte kinsa gikatakdang mosalmot sa PBA D-League Rookie Draft sa Enero, mipakatap og 34 puntos nga giabagan sa 17 ni Johncork Cabahug ug 18 usab gikan ni Toto Segumpan.

Unang nakaarangkada ang Webmasters ni coach Rocky Alcoseba human init nga nakasugod ang ilang shooter nga si Tristan Albina kinsa maoy miangkon sa unang diyes puntos sa UC, tulo niini gikan sa three-point area, alang sa ilang 10-2 nga labaw.

Apan hinayhinayng mibawos ang Lancers hangtod nga nagpulipuli og sakmit sa bintaha ang matag habig.

Nakuhaan ang puwersa sa Webmasters sa katapusang 2:45 segundos ang nahabilin sa third quarter human ang usa sa ilang pambato nga si Jan

Jabello wa makatiwas sa duwa sa dihang nawad-an kini sa balanse pagtugpa gikan nga nag-layup atubangan ni Delator.

Midangat pa og pipila ka gutlo una pa mapagawas sa korte si Jabello ginamit ang stretcher ug gidala sa hospital.

Bisan pa sa pagkawagtang ni Jabello kinsa nakatigom na og 17 puntos sa wa pa ang insidente, padayon nga nakigkombati ang Webs, apan gilupig sila sa lahutay sa himatyong mga minutos sa duwa.

Si Suerte maoy napiling most valuable player (MVP) sa usa ka semanang tournament diin gikauban niya sa Mythical five sila si Cabahug, Albina, Batuhan ug Shane Menina.

Sa sayo pa, ang gilabni sa University of Southern Philippines Foundation (USPF) Panthers ang ikatulong puwesto pinaagi sa paglubong sa Southwestern University-Phinma Cobras, 88-61.

Gawas sa mga tropeyo nga giabag ni sportsman./businessman Jerry Oberes sa Emil's Fresh Chicken, ang kampiyon miuli nga may P100,000 samtang ang runner-up nga nakadawat og P60,000.

Ang third ug fourth placers nakadawat usab og tag P30,000 ug P15,000.

Si Mayor Lani Pena uban sa municipal administrator nga si Concordio Mejias maoy personal nga mihatag sa mga premyo atol sa awarding ceremonies.

Subling gipahibawo sa mayor nga ang maong lega ipahigayon na sa matag tuig.

Mga puntos: USP (88) - Colina 20, Cauba 18, Langahin 12, Sarahina 11, Archival 7, Mendez 6, Cada 5, Managor 3, Villarta 3, Patalinghug 2. SWU (61) - Imperial 14, Roncal 12, Bilao 9, Sanchez 6, Gabutan 4, Alforque 4, Molina 3, Boc 3, Ugzang 1.

UV (104) - Suerte 34, Cabahug 17, Segumpan 16, Delator 8, Claridad 7, Maestre 6, Cometa 5, Butohan 4, Tarrosa 3, Saga 3, Villaceran 2. UC (99) - Galinato 21, Menina 18, Albina 18, Jabello 17, Dela Cruse 10, Gabisan 6, Bacalso 4, Kenpak 4.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph