Tambagi ko Noy Tikyo: Nangahanaw

DEAR Noy Tikyo,

Just call me Faith. Mag-23 anyos pa.

Kining akong patambagan nimo bahin ni sa akong lovelife.

Sa akong edad karon, 7 na ka lalaki ang nauyab nako. Apan pulos sab sila nangawala.

Tinud-anay kong mahigugma. Akong buhaton ang tanan basta love nako siya. Apan di sila makahuwat sa saktong panahon, busa gibiyaan ko nila.

Gusto man god nila nga kuhaon dayon ang akong pagkababaye. Pero gibalibaran ko sila sa ilang hangyo kay gustong magpabilin kong virgin hangtud nga di pa ko maminyo.

Mao ni kanunay nga rason nganong kalit lang silang nangahanaw sa akong kinabuhi.

Tungod niini, karon wala na sab koy uyab.

Ako ba kaha ang angay nga pakasad-on nganong naingon niini ang akong lovelife? I need your advice. Thank you.

Faith

***

Faith,

Kon mibuwag sila nimo, tungod kay wala nila maangkon ang ilang lawasnong tinguha gikan nimo, superficial lang ang ilang gugma.

Ayaw paglugak tungod niini. Di ikaw ang angay nga magsubo kay sakto ka sa imong gibuhat.

Kon tinuod unta ang ilang gugma nimo, di sila mopahimulos sa panahon pinaagi sa paghangyo sa maong butang nga kaugalingon lang nila ang gilantaw.

Tinuod sakit nga biyaan sa hinigugma. Apan sa ilang gibuhat, di gugma ang ilang giapas nimo, kon di ang imong lawas lang.

Kon tinuod silang nagmahal, mahibawo unta silang morespeto ug mosabot sa imong gusto kay alang man kini sa imong kaayohan sab.

Ayaw og kawili nila. Ug ayaw og kalugak sa imong baruganan kay nahisubay ka sa matarong nga dalan.

Ang angay nga maanugnan sa nahitabo, di ikaw, kon di sila.

Nagtuo ko, Faith, nga wala pa gyud miabot sa imong kinabuhi ang lalaki nga gitakda sa Ginoo para nimo. Huwat lang sa saktong panahon, kay moabot ra siya nga di damhon.

Pag-ampo ngadto sa Ginoo aron nga kanunay ka Niyang giyahan ug proteksiyonan batok sa mga tawong mopahimulos lang sa higayon.

NOY TIKYO

(Ipadala ang inyong suwat-suliran sa noytikyo@yahoo.com)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph