PIPILA ka tulogan na lang ug Pasko na. Ikatulo na ka Paskohan nga nahimong pangulo ang atong kanhi amahan sa Dakbayan sa Davao. Kamo na lay istorya kung mas maayo ba ang inyong kahimtang karong panahona kung ikumpara sa nilabay nga mga administrasyon.
Ug nunot sa okasyon karong tuiga, ang Tambayan Center for Children's Rights (Tambayan), usa ka nag-unang non-government organization dinhi sa Davao nga nag-atiman sa mga babayeng-bata sa kadalanan manghatag og gasa sa mga kabus sa lungsod.
Sobra duha na ka dekada ang Tambayan ug hataas na ang iyang naabot sa pagtabang sa kabataan dili lang sa Davao kung dili sa uban pang lugar sa Mindanao. Daghan na usab kining nadawat nga pasidungog sa nagkadaiyang grupo tungod sa tabang niini sa katilingban.
Niadtong Disyembre 5 nadawat niini ang pasidungog gikan sa Philippine-American Fund sa USAID tungod sa malampusong duha ka tuig nga implementasyon sa Anti-Trafficking in Person project sa tulo ka syudad ug duha ka probinsiya sa Southern Mindanao.
Karong bulana usab, itukod sa Tambayan diha sa Barangays 21-C, 22-C and
23-C sa may dalang Quezon Boulevard ang 218 ka unit nga "wall-mounted solar street lights."
Ang naasoyng barangay maoy nahimong target sa ilang tulo ka tuig nga Water and Sanitation Project. Sulod sa maong proyekto ang pagtukod og upat (4) ka "Community Latrines" o komyunal nga kasilyas sa ilabi na sa Badjao Community sa Barangay 23-C.
Sumala sa nakuhang datos sa Tambayan niadtong 2016, sobra 20,000 ka pamilya nga nagpuyo haduol sa dagat kay walay saktong kasilyas. Kamo nay imagine kung giunsa nila paglabay sa ilang hugaw matag adlaw. Ingon nila kalas daw og medyas didto.
Ang solar lights gimuntar sa lugar palibot sa kasilyas aron iwas disgrasya ug maprotektahan sab ang mga bata nga mogamit sa maong pasilidad.
Gawas niini, ipang-apud-apod usab sa Tambayan karong bulana ang sobra 500 ka mga stove nga ginama sa bato ug bricks ug mga 100 ka "Fire Protection Shield" o abuhan nga gama sa puthaw ug tiles sa mapiling pamilya sa mao gihapong barangay.
Ang maong proyekto naghandom nga mamentinar ang sanitasyon sa katawhan ilabi na ang mga bata nga maoy target sa programa sa Tambayan.
Buot usab sa Tambayan nga malikayan ang sunog ug uban pang disgrasya sama sa pagkusog sa hanging amihan, flashfloods, kontaminasyon sa tubig tungod sa pagpataka og libang ug paglabay og basura, ug abuso sa mga bata nga masinatian sa katawhan o "informal settlers" nga nanimuyo haduol sa dagat ug kasubaan.
Kung wa ko masayop, katulo nasunog ang Barangay 23-C niadtong 2015 nga nakaapekto sa liboan ka mga tawo nga nawad-an og balay o namakwit tungod sa maong hitabo.
Lakip usab sa proyekto mao ang pagtukod og mga modelong balay nga gitawag og "resilient housing units" nga puwedeng sundon sa lumulupyo.
Nag-organisa usab ang Tambayan og mga volunteers gikan sa barangay nga maoy magbalantay sa maayong kahimtang sa kabataan ug kababayen-an, ug kinaiyahan sa maong barangay.
Busa congrats sa Tambayan ug unta madasig ang ubang grupo sa pagtabang sa kabus.