PIPILA na lang ka adlaw, moabot na gyud ang atong gipaabot nga mao ang Pasko.
Ning mga higayona, okupado na ang halos tanan sa pagpangandam sa maong adlaw. Di lang sa espirituwal nga pagpangandam, apan lakip na sab sa materyal.
Unta himuon nato ang tanan aron nga magmalipayon kita sa paghandom nato sa adlaw nga natawhan sa Ginoo. Apan dili sa mga butang nga makadaut sa uban ug makasupak sa balaod.
Giawhag ni Davao City Mayor Sara Duterte-Carpio ang Dabawenyo nga suportahan gihapon ang firecracker ban sa dakbayan.
Nagpahimangno siya nga di supakon ang maong balaod. Kay kon duna may mosupak niini, manubag gayud.
Giawhag niya ang katawhan nga itaho gilayon ngadto sa mga awtoridad ang mga tawo nga magsupak niini aron nga kahatagan gilayon og aksiyon.
Namatikdan man god nga bisan pa og gidili na ang mga pabuto dinhi sa dakbayan, duna gihapoy pipila ka pudyot nga makalusot ug makapabuto atol sa Pasko.
Nagtambag si Duterte-Carpio nga imbis nga firecrackers ang paliton, mas maayo og kadtong mga butang nga mapahimuslan ug makaayo sa tanan.
Unta motamod kita sa balaod nga nagdili sa pagpabuto gumikan kay di man lang kini kaayohan sa uban, kon di kanato usab.
Nasayud kita kon unsay mahatud niini nga kadaut sa atong lawas. Gawas kanato, di sab kini makaayo sa uban nga usahay mapiskan lang sa aksidente tungod sa hinimoan sa laing tawo.
Busa angay nga ipatigbabaw nato karong Pasko ang pagrespetohay, di lang sa atong katungod, apan sa katungod sab sa uban.
Kitang tanan gustong magmalipayon ning panahona, apan unta ang atong kalipay di makadaut ngadto sa uban.