MALALAG, Davao del Sur -- Gideklara sa doktor nga patay na dihang niabot sa balay tambalanan ang angkas sa motorsiklo human madisgrasya, alas 9 sa gabii.
Padayon sab nga gitambalan ang drayber sa motorsiklo ug lain pang angkas.
Subay sa taho sa kapulisan nga usa ka kolor blue nga Kawasaki Rouser ang gimaneho ni Ken Watin Dacay, 20, ulitawo nga taga Barangay Calabanet, lungsod sa Glan, Sarangani Province.
Angkas ni Watin ang silingang si Haidie Velasco, 23, ug Benjamen Bertudez, 38, minyo nga taga Silay, Polomolok, South Cotabato.
Sumala sa kapulisan nga nahitabo ang insidente samtang nagdagan ang motorsiklo sa national highway sa Sitio Tawal, Barangay Tagansuli, lungsod sa Malalag, Davao del Sur.
Milutaw sa imbestigasyon nga nawad-an og balanse sa manobela ang drayber paghidangat sa kurbadang parte ug nahaybol.
Daling gipangdala ngadto sa Golingay General Hospital ang mga biktima apan si Haidie ang gideklarang patay sa mihiling nga doktor. (Orlando B. Dinoy)