MIDSAYAP, North Cotabato -- Gipahutan pa sa mga awtoridad ang seguridad sa probinsiya alang sa nagsingabot ang plebisito sa Bangsamoro Ogranic Law sa Enero 21, 2019.
Gibutyag ni North Cotabato Police Provincial Office director, Senior Superintendent Maximo Layugan nga giplastar na nila ang mga security plan sa 39 ka barangay nga mahiapil sa plebisito.
Molingkod sab ang ubang pulis isip mga Board of Election Inspectors sa mga dapit nga una nang gitumbok nga election hotspot.
Mga BEIs kanhi nang gibansay sa mga barangay nga hulga ang seguridad sa mga magtutudlo niadtong Barangay ug Sangguniang Kabataan Election 2018.
Gikanayon ni PRO 12 Regional Director, C/Supt Eliseo Tam Rasco nga tumong sa paghan-ay sa security plan aron maseguro nga luwas ang katawhan o mga botante sa plebisito sa BOL.
Ang 39 ka barangay sa North Cotabato gilangkuban sa Dunguan, Lower Mingading ug Tapodoc sa Aleosan, Manarapan ug Nasapian sa Carmen; Nanga-an, Simbuhay ug Sanggadong sa Kabacan; Damatulan, Kadigasan, Kadingilan, Kapinpilan, Kudarangan, Central Labas, Malingao, Mudseng, Nabalawag, Olandang, Sambulawan ug Tugal sa Midsayap; Lower Baguer, Balacayon, Buricain, Datu Binasing, Kadingilan, Matilac, Patot ug Lower Pangangkalan sa Pigkawayan; og Bagoinged, Balatican, Balong, Balongis, Batulawan, Buliok, Gokotan, Kabasalan, Lagunde, Macabual ug Macasendeg sa Pikit.
Gawas sa militar ug kapulisan, moabag sab ang Moro Islamic Liberation Front (MILF) sa pagbantay sa ilang mga kontroladong dapit nga dili makasulod ang mga dautang pundok nga manghasi sa nagsingabot nga plebisito sa BOL. (Edgar E. Fuerzas)