Erlando Ligan Majan
Barangay Hipodromo, Cebu City
NADASMAGAN ang gimaneho kong motorsiklo ug wala akoy namatikdan kon unsay nakadasmag kanako. Nahigmata ako sa usa ka lawak sa ospital sa dakbayan. Ang doktor nga miatiman kanako maoy mipaila kanako sa usa ka batan-ong lalake.
“Siya ang nagdala kanimo dinhi,” matod sa doktor nga tiguwang na ug may antiyuhos. “Gipunit ka niya sa tungang dalan nga wala nay panimuot. Iya kang gidala dinhi aron maluwas ka.”
Ug mipaila kanako ang batan-ong lalake, “Sir, ako si Jonathan. Estudyante ko sa usa ka unibersidad.”
Nagpasalamat ako sa iyang pagluwas kanako. “Milagro kining nahitabo kanako. Pinaskuhan ko gikan sa Diyos nga may linalang nga miluwas kanako. Ug igo ra diay kong nalipong ug napangos. Apan kinsa ba ang nakadasmag kanako?”
Misanong si Jonathan. “Nakuha ko ang plate number sa awtong nakadasmag kanimo, Sir. Nahibaw-an dayon sa kapulisan kon si kinsa ang tag-iya sa sakyanan. Usa siya ka opisyal sa gobyerno. Moanhi unya ang tawo sa gobyerno nga nakadasmag kanimo. Matod sa kapulisan, mangayo siyag pasaylo. Wala niya tuyoa nga makadasmag kanimo kay naghatod siya sa iyang asawa sa ospital nga mabdos ug napusilan sa usa ka adik-adik.”
May nasabtan ako. Nakaginhawa kog halawom. Dili pa diay akong signos sa kinabuhi. Buhi pa gihapon ako sa panahon sa Pasko.
Apan may namatikdan kong kasubo sa dagway ni Jonathan. Nagduko kini ug nagpanglingo.
“May problem ba, Dong Jonathan?”
Nakapanghupaw siya ug nakapanakla. “Tingali tuyo sa Ginuo nga dili ko makapatayg tawo. Nag-motorsiklo sab ko niadtong higayuna. Gigukod ko ang kriminal nga nagsakay sab sa iyang motorsiklo. May dala kong pistola gikan sa akong amigong klasmeyt ko sa unibersidad. Buot kong gukdon ang kriminal ug pusilon. Apan sa dalan nakit-an ko ikaw nga nadasmagan sa awto ug nasukamod sa daplin. Mihunong ko sa akong paggukod sa kriminal. Gipunit ko ikaw ug gidala dinhi sa ospital.”
Nakapamalandong ko. “Mao ba? Si kinsa ba kanang giingon mong kriminal?”
“Anak siya sa inilang negusyante ug pulitiko. Adis-adis usab siya. Gilugos ug gipatay niya ang uyab ko. Apan didto sa hukmanan nakalingkawas siya kay way testigo ug klarong ebidensiya batok kaniya. Kanunay lang siyang makalusot. May nag-ingon nga pipila na ka babaye ang iyang nabiktima. Mas maayong kalimtan ko na lang ang tanan. Kapait sa pinaskuhan ko ning buwan sa Disyembre!”
Nakaila ako sa tawo nga nahisgutan ni Jonathan. Ilado siya sa katawhan. Nakaila sab ko sa anak niini nga adis-adis. Sa hilom nakaingon ako: “May pinaskuhan ko alang kang Jonathan. Hustisya sa kamatayon sa iyang uyab. Retirado akong pulis. Usa ako ka ‘vigilante’.”
Pag-abot sa adlaw sa Pasko nabalita sa TV ug mga mantalaan nga usa ka anak sa iladong negusyante ug pulitiko nga gituohang nagumon sab sa druga gipusil patay sa usa ka wa hiilhing mamumuno nga nagsakay og motorsiklo. (Katapusan)