YEHEEEY! Daug na sad ang Philippines!
Sa tanang mga kandidata nga gipada sa Bb. Pilipinas sa Miss Universe way duda, si Catriona Gray ang pinaka-lig-on ug pinakangilngig manubag sa Q and A.
Mao nang bisan kinsay pangutan-on taas kaayo ang expectation nila nga makuha gyud sa 24-anyos nga Pinay-Australian beauty ang korona.
Salamat kay wa pakyasa ni Catriona ang pila ka milyong pinoy sa tibuok kalibutan nga naglaum gyud sa iyang kadaugan gahapon sa Miss Universe 2018.
Way kurat
Ako di ko ganahan mag-expect og dako kay basig mausab unya ang timpla inig abot sa actual competition.
Pero lahi si Catriona kay wa’y kurat. Labi na sa final question and answer sa dihang Top 3 na lang sila, grabe nanlimbawot akong balhibo sa iyang tubag. Ingon pa lagi niya: “laban lang!”
Ang nakanindot rong dauga ni Catriona kay sud lang sa upat katuig naka-duha dayon ta. Meaning, daghang gwapa sa Pinas! Agree? Siyempre! Hehe...
No. 4 na ta
Ang Pilipinas mao na karon ang ikaupat nga nasud nga dunay pinakadaghan og daug sa kasaysayan sa Miss Universe pageant.
Una, si Gloria Diaz (1969), Margie Moran (1973), Pia Wurtzbach (2015) ug karon si Catriona Gray (2018).
No. 1 gihapon ang USA nga dunay 8 ka korona, gisundan sa Venezuela, 7, ug Puerto Rico, 5.
Bisan dili Pinoy ang mga amahan nilang Pia ug Catriona pero sa pagkangan nga Pinay ang ilang mga inahan dako na gihapon nang garbo sa atong nasud.
Fantastica
Super jampacked ang mall show sa cast sa pelikulang “Fantastica” niadtong Dominggo sa SM Seaside City Cebu.
Unang nitungtong sa stage si Loisa Andalio nga nikanta sa iyang latest single nga “Sasamahan Kita.” Dayon nisunod si Dingdong Dantes nga nikanta og medley sa Eraserheads hits.
Puwerteng sabaa sa crowd paggawas ni Vice Ganda nga nikanta sa iyang latest single nga “Kailan Aasa.”
Si Loisa ug Dingdong na-interbyu namo sa Radisson Blu hotel samtang si Vice didto na sa backstage sa SM Seaside kay delayed kuno ang iyang flight.
A million thanks
Karong Sabado, Dec. 22, ang Kapamilya star ug Hashtag member Luke Conde ang guest star sa unang bola sa “A Million Thanks” raffle promo sa Gaisano Main, Country Mall, Gaisano Balamban, Bogo ug Moalboal.
Ang show ipahigayon alas 7 sa gabii sa Country Mall Parking Area. Nagpadayon sad hangtod Dec. 24 ang ilang “12 Days Before Christmas Sale,” diin 3 ka brand new Mazda3 ug home appliances ang premyo. Shopping na!