SA kasamtangang senaryo, daw igo ra’ng molabay sa tugkaran sa NLEX Road Warriors ang duha ka dekalidad nga rookies nga ilang nabira sa Philippine Basketball Association (PBA) 2018 Rookie Draft niadtong Dominggo.
Sa drafting, ang Road Warriors supresang nipili sa Sugbuanong si Paul Desiderio isip No.4 overall pick unya nakuha sab nila si Abu Tratter isip No.7 overall pick.
Apan mismong sa adlaw sa drafting, gikompirmar sa Road Warriors nga ilang i-trade sila si Desiderio ug Tratter ngadto sa Blackwater Elite alang kang Poy Erram.
Giangkon sa Road Warriors nga niadto pa lang Septiyembre atol sa 2018 Asian Games sa Indonesia, nakigsabot na ang Elite kanila kabahin sa trade nga naglambigit sa ni 6’7” Erram.
Sa Asian Games, si Erram nagduwa sa Team Pilipinas nga gigiyahan ni NLEX coach Yeng Guiao.
“As far back as the Asian Games, the Blackwater Elite have been discussing a trade with us involving Poy Erram, a much-needed big man who impressed Coach Yeng during his stint with the national team,” opisyal nga pamahayag sa NLEX.
Giangkon sab sa Road Warriors nga miuyon sila nga ibaylo ang katungod sa ilang duha ka first round picks alang kang Erram pagkabuntag sa adlaw sa drafting.
Hinuon gitataw ni Guiao nga kon dili maaprubahan sa PBA ang ilang pagpakigsabot sa Elite, kuntento ug malipayon ra gihapon siya nga moduwa kaniya sila si Desiderio ug Tratter.
“If the trade does not happen, we would have two great players to join us,” asoy ni Guiao nga napatik sa Spin.ph.
Sa laing bahin, pormal nang nagsabot ang Talk N’ Text KaTropa ug San Miguel Beermen sa usa ka trade nga naglambigit sa three-time PBA scoring champion Terrence Romeo.
Sa kasamtangan, makuha sa Beermen si Romeo gikan sa KaTropa baylo nila ni Bryan Heruela ug David Semerad lakip na ang 1st round picks sa Beermen sa 2019 ug 2020. Hinuon nagkinahanglan pa kining maaprubahan sa PBA. ESL