NING pagsuwat, wala pa masayri kon kinsa ang mga ningdaog sa makapangangha nga mga ganti sa raffles sa birthday celebration ni boxing Manny Pacquiao kagabii sa usa sa mga shopping mall sa General Santos City.
Apan labing seguro, ang palarang mga mananaog sa giingong labing grandiyusong kasaulogan sa adlawng natawhan sa Pambansang Kamao sa Pilipinas ibayaw sa pangandod sa kalipay.
Lalim ba’y puwedeng madaog ang usa ka Ford ranger pick-up, usa ka Toyota Vios, duha ka mga Suzuki Dzire, 58 ka mga motorsiklo, 24 ka mga 40-inch LED television ug lain pa’ng 1,250 ka nagkadaiyang mga butang.
“This is Senator Pacquiao’s way of sharing his blessings to people especially the poorest of the poor,” matod sa usa sa mga sinaligan ni Pacquiao nga si Mel Bernabe sa interbyu sa www.philboxing.com.
Niadtong Dominggo human sa iyang pagtambong og misa, si Pacquiao miduaw og mga komunidad sa Sarangani Province ug General Santos ug nanghatag og 2,000 ka grocery items.
Nahimo na kining tradisyon sa 8-division world champion sa iyang adlawng natawhan sukad nga giuwan kini og mga grasya gikan sa iyang pagpamoksing.
Ang fighting senator nga nag-edad na og 40, gikatakdan modepensa sa iyang WBA welterweight title karong Enero 19 didto sa Las Vegas. ESL