MIHANGYO si Police Regional Office (PRO) 7 Director Debold Sinas kang Cebu Archbishop Jose Palma nga dili kalimtan ang pagpangayo og pasaylo sa Ginuo alang sa mga pulis ug kini nagpaampo nga dili masaag sa dalan ang mga pulis padung ngadto sa langit.
“Kay lisod kaayo buhaton kung impyerno, daghan na kaayo og pulis didto. Didto lang pud mi sa langit kay gamay lang mi,”pamulong sa director sa PRO 7 dungan sa pagpangatawa sa mga tawo nga nanimba sa ikaduhang adlaw sa Misa de Gallo sa St. Ignatius Chapel sud sa Camp Sergio Osmeña Sr. Headquarters sa kaadlawon sa Lunes, Disyembre 17.
Sa iyang wali, gipahimug-atan ni Palma nga way perpekto nga pamilya dinhi sa kalibotan.
“We do not choose our family. And seldom can you find a perfect family. We live in an imperfect world,” dugang niini.
Sentro sa iyang wali ang kabahin sa pamilya nga maoy basahon sa gospel sumala ni San Mateo kabahin sa sinugdanan sa pamilya ni Jesukristo gikan sa naunang mga henerasyon.
Ang arsobispo nipunto nga bisan ang pamilya ni Jesus dili perpekto apan gikan niini natawo ang manluluwas.
Si Palma nipasabot nga bisan sa ka imperpekto sa pamilya diin dunay mga salawayon ug makahimo og kasaypanan, katungdanan sa matag usa ang paghigugma sa pamilya ug pagpanaw uban niini ug ang pagdawat sa kamatuoran bahin niini.
Sa pito ka tuig nga pagka arsobispo ni Palma sa artsidyosesis sa Sugbo sukad niadtong 2011, matod niya, kini ang unang higayon nga nagsaulog siya og Misa de Gallo siya sa PRO 7 headquarters.
Sumala ni Sinas ang pagmisa ni Palma sa PRO 7 dako og ikatabang sa pag-uplift sa ilang kasingkasing ug espiritu.