MA-STABILIZE na unya ang supply sa kuryente sa lalawigan sa Bohol sa higayon mapatuman na sa National Grid Corporation of the Philippines (NGCP) ang Cebu-Bohol Interconnection.
Atol sa ikaupat nga full council meeting sa Regional Development Council (RDC) 7 niadtong Biyernes, Disyembre 14, si Bohol Governor Edgar Chatto, kanhi chairman sa RDC 7, nipahibawo nga pirmahan na niya ang executive order alang sa pagtukod og local coordination team nga langkoban sa lokal nga mga opisyal ug hingtungdang mga ahensiya.
Ang local team nga masakop ubos sa Bohol Energy Development Advisory Group, nagtinguha nga mahatagan og igong suporta ang NGCP aron mapaspasan ang pagkuha sa mga rekisitos sa pagpalit og luna ug ubang panginahanglan sa road-right of way.
Matod ni NGCP Corporate Communications and Public Officer for Cebu and Bohol Betty Martinez, moabot sa P21 bilyones ang inisyal nga giduso nga magasto sa Cebu-Bohol interconnection.
Sa sunod tuig, magsugod na sila sa topography, parcillary ug hydrography surveys diin apil sa ilang susihon ang mga luna nga masud sa rota nga subayon sa interconnection, kinsa ang mga nanag-iya sa yuta.
Sumala ni Chatto kon madayon ang proyekto maghatag kini og dugang 400 megawatts nga supply sa kuryente sa Bohol nga sa kasamtangan nagsalig sa 90 megawatts nga supply.
Si Martinez namahayag sa kasamtangan ang 138 kilovolt (KV) Cebu-Bohol interconnection ang gisaligan sa Bohol nga dunay limited transfer capacity nga 90 megawatts.
Sigon ni Chatto nagkaestoryahanay na sila ni Gobernador Hilario Davide III kabahin sa proyekto ug ila kining i-follow up aron mas mapaspasan ang pagpatuman niini.
Ang Cebu-Bohol link nga gipaabot mahuman sa 2021, maglambigit og 29 kilometros nga overhead line gikan sa lungsod sa Dumanjug ngadto sa lungsod sa Argao sa Sugbo; 30 kilometros nga submarine cable gikan sa Argao ngadto sa Loon, Bohol ug 26 kilometros nga overhead line gikan sa Loon ngadto sa substation sa Corella.
Gidugang ni Martinez bisan kon matuman na ang Cebu-Bohol interconnection, magpabilin gihapon nga operational ang Leyte-Bohol interconnection sa grid.
Si Chatto nisaysay nga pursigido ang RDC 7 og follow up sa proyekto aron matuman labi na niadtong panahon nga siya pa ang chairman niini.
Siya nidugang nasinati ang lapad nga blackout sa Bohol human sa kusog nga linog niadtong 2013 diin na-disconnect ang lalawigan sa linya sa grid. SCG