DUHA ka mga tawo nabiktima sa mga pagpamusil sa dakbayan sa Sugbo nga naggintang lang og kapin sa tulo ka mga oras.
Sa unang hitabo, gipusil sa wa pa mailhing lalake ang usa ka babayeng negusyante sa Forest Hills Drive, Banawa, Barangay Guadalupe, siyudad sa Sugbo niadtong Dominggo sa alas 8 sa gabii, Disyembre 16.
Ang gunman ug biktima pulos nagsakay og mga habalhabal.
Ang biktima giila nga si Letecia Dosdos, hingkod, adunay negosyo sa pagpautang og kwarta.
Sa imbestigasyon sa Guadalupe police nga nagsakay si Dosdos sa usa ka habal-habal paingon sa ilang balay, adunay wa mailhing lalake nga nagsunod nga luwan usab og motorsiklo.
Sa dihang mikanaog na si Dosdos ug paingun na mosulod sa gate sa ilang balay, ang gunman nipusil niini tumong sa liog.
Human sa hitabo, sigun sa mga nakasaksi sa dapit, daling misibat samtang si Dosdos nga nagkadugo na gidali pagtabang sa mga residente aron madala sa tambalanan.
Matod ni Sr. Inspector Dexter Basirgo, hepe sa Mambaling police station, nga ang usa sa ilang gisubay sa pagkakaron ang personal nga atraso lakip na ang may kalabutan sa iyang negosyo.
Gawas nga magpautang siyag kwarta, giingong aduna usab siyay utang nga kanunay maningil nga maoy subayon karon sa mga imbestigador.
Samtang pagka alas 12:10 sa Lunes sa kaadlawon, Disyembre 17, gipusil usab ang usa ka 28 anyos nga si Dexter Duran Petor sa sitio Lower, Barangay Kalunasan.
Nailhan hinuon nila ang suspek nga si Simon Jacaban, 20, taga sitio Kamanggahan.
Sa imbestigasyon sa Guadalupe police station, si Petor naa ra sa sulod sa iyang giabangang balay apan kalit lang gisulod ni Jacaban ug gipusil tumong sa liog. AYB