MAKADAWAT og tag usa ka sakong bugas ang matag usa ka habalhabal ug Angkas driver kinsa nagpuyo sa dakbayan sa Sugbo gikan sa City Hall.
Kini human giaprobahan sa Cebu City Council pinangulohan ni Bise Mayor Edgardo Labella ang resolution ni Konsehal Mary Ann delos Santos nga magahin og P15 milyones gikan sa pundo sa Philippine Amusement and Gaming Corporation( Pagcor) isip hinabang atol sa special session kagahapon.
Si Mayor Tomas Osmeña nagkanayon nga ang maong kantidad gamiton pagpalit og bugas para sa di mominos 6,000 ka mga driver, kinsa maoy direktang naapektohan sa desisyon sa Supreme Court nga magtugot sa pagdakop kanila kay illegal ang ilang operasyon.
Ang presiding officer sa City Council nga si Labella nihangop sa maong resolution sanglit siya mismo nibati og kaluoy ngadto sa libuan ka mga pamilya nga apektado.
“Atong giaprobahan ug gisuportahan unanimously ang paghatag og P15 million ngadto sa na-displaced nga mga habalhabal drivers ug Angkas hilabi na sa panginahanglan niining adlaw sa Pasko,” padayag sa bise mayor.
Kinsay makadawat?
Si Konsehal Joel Garganera, kinsa usa sa niaprobar apan nangita og katin-awan sanglit ang nalatid sa resolution mga driver sa Angkas ug habalhabal.
Nasabotan nga ang makadawat mao kadtong mga driver nga nagpuyo gikan sa 80 ka mga barangay sa siyudad, sanglit matod pa ni Garganera, adunay mga Angkas nga tua nagpuyo Mandaue, Lapu-Lapu ug Talisay ug ubang dapit.
Ang Office of the Mayor maoy mohimo og komitiba aron maoy motino sa mga benepisyaryo ug unsay ilang pamaagi.
Si Garganera niingon nga bisan unsa pay buhaton sa gobyerno, samtang di pa mahan-ay sa pamunoan ni Osmeña ang kahuot sa trapiko gumikan sa kakuwang sa mass transport, magpabilin ang habalhabal sanglit ang bugtong paagi para madali paingon sa destinasyon.
Si Konsehal Raymond Garcia wa say pagsupak gumikan sa espiritu sa Pasko.
“Uyon man ko ana labi na nga Pasko karon pero makapangutana lang ta sa motibo kon kini para pagtabang sa mga habalhabal drivers o di kahakini para sa ilahang pangampanya sa 2019? “ padayang ni Garcia.
Mangayo og giya
Usa ka misa ang ipahigayon ni Osmeña nga tambongan sa mga lider ug mga habalhabal driver karong Dominggo, Disyembre 23, sa Archbishop’s Palace.
Ang mayor nagkanayon nga tuyo sa misa mao nga ma-divert ang huna-huna ug problema sa mga drivers nga apektado.
“We are going to have a mass. We are going to ask for blessing from up there to help us. We want to divert the agitation of the drivers, something more spiritual,” padayag ni Osmeña.
Si Osmeña niimbitar kang House Speaker Gloria Arroyo ug Senate President Vicente Sotto III.
Ang misa pagadumalaon ni Archbishop Jose Palma.
“Asking them (Arroyo ug Sotto) to listen the plight of the people, to legitimize what is reality,” dugang sa mayor.
Matod ni Osmeña nga gusto siyang mapaminaw ang yangongo sa mga driver sa duha ka dagkong lider sa House aron mapangitaan og paagi aron ma-lehitimo ang panginabuhian sa libuan ka mga drivers pinaagi sa pagpamasahero.
Matod ni Osmeña nga nabalaka siya sa mga drivers ug labaw na sa mga sumasakay nga di na makasakay og habalhabal gumikan sa pagpahunong sa ilang operasyon.
Ang Land Transportation Office (LTO)7 nagsugod na sa ilang operasyon pagpanakop human sila gimanduan sa DOTr.
Si LTO 7 Director Victor Caindex nagkanayon nga igo lang sila nagsunod sa legal nga mando ug pinasubay sa balaod.
Iyang giawhag ang katawhan sa pagsabot sanglit ang Pilpinas usa ka gobyerno ug dili usa ka nasod nga gipadagan pinaagi sa anarchy.
Dugang ni Caindec nga maayong buhaton sa mga magbabalaod, mao ang paghimo sa maong operasyon nga legal aron walay otoridad nga modakop kanila.