Diputado: Nindot ipanghambog

HUSTO ang gisulti sa mga tawo - mao kining panahona nga nindot paminawon nga Pinoy ta.

Ngano man?

Tungod sa nakab-ot nga kalamposan ni Catriona Gray isip Miss Universe 2018 nga gihimo dili pa lang dugay didto sa Thailand.

Lami paminawon nga kababayan nato ang bag-o nga Miss Universe og garbo sab natong tanan ang iyang nakab-ot nga kalamposan.

Bahala og dili Pinoy paminawon ang iyang ngalan nga ““Catriona” ug ang iyang apilyido nga “Gray.”

Ang importante nga taga Pilipinas ang iyang mama.

• • •

Daghan ang miresulta sa pagdaog ni Catriona Gray.

Migawas na sab ang pagka-siaw sa mga Pinoy.

Ang titulo niini “nabalik na.”

Nabalik na sab sa Pilipinas ang gikaintapan nga korona pagka-Miss Universe human sa pipila ka tuig nga lain ang nag-gunit niini gikan sa mga kamot ni Pia Wurtzbach kaniadtong 2015.

Nabalik na sab ang Balangiga Bells human sa dugay nga mga katuigan nga didto kini sa mga kamot sa mga Amerikano.

Ang 1.7B nga PhilHealth Funds, nabalik na ba kuno ni Sen. Riza Hontiveros?

• • •

Bibo ang Kongreso karon.

Matod pa ni Senador Ping Lacson, dunay budgetary insertion kuno sa national budget para sunod tuig. Ang maong budget para 2019 gituki og giaprobahan sa Ubos Balay Balaoranan og gipasaka kini sa Senado. Naa na kini sa Senado karon.

Giakusar ni Lacson ang mga Kongresista nga suod ni Speaker Gloria Maapagagal Arroyo nga nakapabor sa maong budgetary insertion.

Mitubag si Majority Floor Leader Rolando Andaya nga dili kini tinuod og kon duna may budgetary insertion, gihimo kini sa panahon pa ni kanhi Speaker Pantaleon Alvarez og kanhi Majority Floor Leader Rodulfo Farinas.

Gidugang pa nila nga kakunsabo si Budget Secretary Benjamin Diokno sa maong budgetary insertion.

Gani, mipalabang sila og resolution nga naghangyo sa Presidente nga ipa-reconsider ang pagtudlo ni Diokno isip DBM Secretary.

Tinuod o dili, usa ra tumoy niining tanan.

Kwarta o pondo alang sa pagpadagan og proyekto ang giawayan.

Nganong nag-away man?

Kay wala maayo og bahin.

Nganong wala man angaya?

Mao kanay giingon nga weather-weather lang.

Kon kinsay naglingkod, maoy makapabor. Kon wala ka makauyon, huwata nga ikaw nay maglingkod.

• • •

Nindot ang tubag ni Catriona Gray mahitungod sa isyo sa pag-legalize sa Marijuana.

Matod pa niya, uyon siya nga i-legalize basta alang sa medikal nga katuyoan og dili alang sa paglingaw-lingaw lang.

Kon tumanon kini, sayon lang kini sultion og lisod buhaton.

Ngano man?

Daghang paagi sa pag-ipsot sa balaod.

Gani, nahinabi nako ang usa ka US Agriculture Engineer didto sa California og matod pa niya, dako kaayo niyang problema ang balaod nga nagtugot sa pag-gamit sa marijuana alang sa katuyoang medikal.

Iyang anak mismo sayon ra kaayo makapalit og marijuana kauban sa iyang mga barkada og sama lang sa nagpalit og sigarilyo ang kasayon niini.

Tungod niini, kanunay na nga nag-gamit ang iyang anak ug marijuana kauban sa iyang mga barkada.

Para lingaw-lingaw lang.

Kon iyang buyagon, moingon lang nga maayo pay mogamit sa marijuana kay sa heroin o cocaine.

Kamo nga nagbasa, unsay inyong ikasulti bahin sa plano pag-legalize sa marijuana?

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph