DUHA ang patay samtang samaran ang kapin 20 ka mga pasahero human naaksidente sa pasaheroan nga dyip niadtong Disyembre 17 diha sa Taglimao ning siyudad sa Cagayan de Oro.
Patay sila si Danilo Dablio, 43, minyo, residente sa Barangay Tuburan ning siyudad ug Mario Pimentel, residente sa Barangay Pigsag-an ning siyudad.
Sa inisyal nga imbestigasiyon sa kapulisan sa Police Station 8 (PS8) sa Lumbia, gikabutyag nga nabuthan og brake ang Tumpagon liner hinungdan nga nilahos sa pangpang nga bahin.
Nabalintong sa ikaduhang higayon ang maong sakyanan hinungdan nga ang mga biktima ilabi na nga anaa sa ibabaw sa maong dyip ang nagrabehan.
Samtang mokabat usab sa kapin sa 25 ka mga pasahero ang samaran ug daling gipangdala sa balay tambalanan sa siyudad.
Gibutyag usab sa tinugyanan sa Land Transportation Franchising & Regulatory Board (LTFRB)-Northern Mindanao nga makadawat ang pamilya sa mga biktima og mokabat P200 mil matag pamilya samtang ang mga samaran anaa sa P20 mil.
Sa pagkakaron padayon pa nga nagpaalim sa balay tambalanan ang ubay-ubay ka mga biktima.