GITUOHANG tungod sa bayrunon sa uniporme ang posibleng hinungdan sa paghikog sa usa ka estudyante pasado alas 9:00 sa gabii niadtong Disyembre 16 sa Max Suniel Street, Barangay Carmen ning siyudad sa Cagayan de Oro.
Patay na nga napalgan si John Rey Mark (bansagon gitago), 16, ulitawo, lumad sa Pelaez, Claveria, Misamis Oriental apan kasamtangang nagpuyo ug nag-abang sa dapit diin nahitabo ang insidente.
Sa nahipos nga impormasiyon gikan sa kapulisan sa Police Station 4 (PS4) sa Carmen gikabutyag nga napalgan sa inahan nga si Alicia ang anak nga nagbitay na diha sa kilid sa pultahan gamit ang sling sa bag.
Dali pa niini nga giputol ang sling gamit ang kutsilyo apan walay swerteng nakabsan na kini sa kinabuhi.
Nigawas usab nga nadunggan pa sa anak sa tag-iya sa giabangan niini nga boarding house nga nisinggit pa ang inahan niini ug miingon nga “nganong nabuhat man ni nimo dong? nga ang bayrunon sa eskwelahan mabayran ra man na” hinungdan nga nagtuo kini nga posibleng problema sa kwarta ang hinungdan niini.
Giingong gipanilngan na ang biktima og P5, 900 isip balayrunon sa Jersey Uniform kinsa mao kini ang naggunit sa kwarta apan wala na kini mahatag.