P24.7-M natunol sa DA sa Kapitolyo

GITUNOL sa buhatan sa Department of Agriculture (DA)-Northern Mindanao ang kantidad nga P14.7 milyon ngadto sa kagamhanan sa probinsyal sa Misamis Oriental.

Mismong si DA-Northern Mindanao regional director Carlene Collado nitunol sa tseke kang Governor Yevgeny Vincente Emano niadtong Lunes, Disyembre 17, atol sa pagpakayab sa nasudnong bandila.

Ang maong kantidad palitay og tulo ka mga sakyanan alang sa buhatan sa Provincial Agriculture Office lakip ang pagpatul-id sa uban mga farm facilities ug palit ug mga kahimanan alang sa buhatan.

Una na usab nga natunol ang laing 10 milyon nga maoy gamiton pagtukod og bodega sa area sa Lumbia ning siyudad sa Cagayan de Oro hilabina nga adunay gipanag-iyahan nga yuta ang Kapitolyo Probinsyal nga adunay kadak-on nga 3,000 square meter.

Matud ni Collado nga dinhi ibutang ang mga stock sa binhi o mga abuno lakip farm equipment alang sa katawhan dili lamang sa Misamis Oriental apan sa tibuok rehiyon.

Dako usab kaayo og tabang ang mapalit nga mga sakyanan hilabina nakita nga malampuson kaayo ang matag semana nga farmer’s market diha sa hawanan sa Kapitolyo Probinsyal.