“Kon mao kini, dunay nagpaluyo nga tanghaga ning maong hitabo? Ug labaw sa tanan dili mahanaw sa huna-huna sa tawo nga duna kini nagpaluyo nga kasabutan.”
SAMTANG nagmaya ang mga Filipino sa kadaugan ni Miss Universe Catriona Gray didto sa Thailand niadtong Lunes, nakurat ako dihang nabasa sa national nga mantalaan labot sa usa ka kontraktor nga malampuson nga nakadawdaw og 30 ka proyekto sa gobyerno.
Sa akong nakita, dakong milagro kini nga nahitabo sa administrasyon diin usa ka nag-inusarang kompanya gihatagan og binilyon nga proyekto bisan wa pa naaprubahan sa Kongreso ang P3.8 trillion budget sunod tuig.
Tiaw mo na nga usa ka single proprietorship nga construction firm mihakot sa binilyong proyekto? Unsa may iyang kapasidad? Ug nganong sa iya man gihatag ang mga proyekto? Busa, makaingon kita nga usa kini ka dakong milagro.
Suma pa ni House Majority Floor Leader Rolando Andaya, Jr., usa kini ka dautan nga business practice nga di angay mahitabo, apan nahitabo kini sa Kongreso.
Ang pahayag ni Andaya miguwa isip tubag sa alegasyon nga nakapahimulos sa pork barrel fund mao ang mga alyado ni House Speaker Gloria Macapagal-Arroyo.
Dugang sa opisyal nga duna siyay ebidensya nga magpamatuod nga kaalyado ni kanhi Speaker Pantaleon Alvarez ang nakapahimulos sa dakong pahat sa budget nga gihisgutan sa milabay nga liderato ug dili ang bag-ong liderato ni Arroyo.
Kon mao kini, dunay nagpaluyo nga tanghaga ning maong hitabo? Ug labaw sa tanan dili mahanaw sa huna-huna sa tawo nga duna kini nagpaluyo nga kasabutan.
Kay nahitabo na kini, atong giawhag ang administrasyon nga lantawon ang maong isyu aron makaingon kita nga matinud-anon ang gobyerno sa ilang kampanya kontra kurapsyon.
Kay mosugot kita o dili, maghunahuna gyud ang mga tawo nga basin dunay anomalya tungod kay wa niagi sa hustong proseso.
Kay base sa mga imbestigasyon sa Ombudsman, Philippine Center for Investigative Journalism ug personal nako nga kasayuran, ang sama niini nga hitabo diin dunay gipaboran nga kontraktor, dunay dagkong komisyon ang opisyal nga maoy tinubdan sa pork barrel fund.
Hinaut nga molihuk niini ang Palasyo sa Malakanyang.