GRABE ang away nga press releases (PRs) sa mantalaan, telebisyon ug radyo labi na sa social media alang sa pag-umol sa imahen sa usa ka politiko o pagdaut sa kaatbang sa politika tungod sa nagkaduol nga eleksiyon sa Mayo 2019.
Pipila ka mga kolumnista ug mga komentarista (puwera sa block-timers) maklaro ang ilang pagpiling pabor sa usa ka partido o kandidato.
Dili kini bag-o matag higayon nga dunay eleksiyon. Normal usab kini nga ehersisyo sa demokrasya. Pinaagi sa debate ug kainit sa away sa kampanya, molugwa ang baho sa pagkatawo sa usa ka kandidato ug makita ang iyang kahuyangan kon walay igong plata-porma nga mapresentar sa publiko.
Apan kitang haring lungsod ang magbag-o, magmabinantayon ug igmat sa pagpili alang sa hatagan sa atong balaang boto ning sayo pa lang.
Samtang, dili motuo dayon sa gisuwat sa mga kolumnista o komentarista ug nasuwat sa social media nga maghisgot og politika o politiko.
Sugyot lang, ilha una pag-ayo ang pagkatawo sa nagsuwat o nagdala sa programa aron dili mabiktima sa laang sa maayo manulti o mosuwat aron pagganoy kanimo ngadto sa ilang kampo.
Unsay imong mapaabot nga kasayuran sa tawong binayran? Hiwi kanunay.
Usahay ginamagama nga istorya batok sa kontra.
Kitang yanong lungsoranon nga dumadawat sa mensahe gikan sa nagpungasi nga labay sa PRs sa politika, kinahanglang kritikal kita nga moproseso sa kasayuran ug hinay-hinay moumol og kaugalingong baruganan nga dili mapalit ug dili mahulga.