KIDAPAWAN CITY -- Gibantayan sa militar ug kapulisan ang mga miyembro sa New People's Army (NPA) sa probinsiya sa North Cotabato.
Kini human nga makadawat og impormasyon nga dunay plano ang mga rebelde nga molusad og katag-katag nga pagpangatake una moabot ang ilang anibersaryo sa Disyembre 26.
Bisan nagdeklara og ceasefire ang komunista wa kini atbangi sa kagamhanan, ilabi na sa 39th ug 19th Infantry Battalion, Philippine Army.
Sumala kang Lieutenant Colonel Rhojun Rosales, 39th IB commanding officer, nga traydor ang mga NPA ug dili makompiyansahan gumikan kalit lang silang mangatake.
Sa intelligence report sa 901st Brigade, nasayran nga nagtapok-tapok ang mga NPA sa tiilan sa Mount Apo sa posibleng halapad nga pagpangatake dungan sa ilang anibersaryo.
Nagsugod na sab og pagpanghatag og suwat sa mga kandidato ang mga rebelde alang sa permit to campaign fee sa ilang mga kontroladong dapit sa probinsiya, utlanan sa Davao del Sur, Davao City ug Bukidnon.
Apan andam ang militar nga protektahan ang mga kandidato nga mangampanya sa mga hilit nga dapit sa probinsiya. (Edgar E. Fuerzas)